بۇرىنعى پرەزيدەنت نۇرسۇلتان نازارباەۆ ءوزىنىڭ ەلباسى مارتەبەسىنىڭ كونستيتۋتسيادان الىنىپ تاستالۋى مۇمكىن ەكەندىگىنە تۇسىنىكتەمە بەرىپ، 5 ماۋسىمدا رەسپۋبليكالىق رەفەرەندۋمعا قاتىساتىنىن مالىمدەدى. نازارباەۆ ۇزاق جىلدار بويى پرەزيدەنت توقاەۆتىڭ قازاقستاندى رەفورمالاۋ جونىندەگى ءىس-ارەكەتتەرىن جان-جاقتى قولداپ كەلە جاتقانىن ساياساتتانۋشى دانيار اشىمباەۆقا بەرگەن سۇقباتىندا ايتتى.  

ء"يا، 5 ماۋسىمدا مەن كونستيتۋتسيالىق قۇقىعىمدى مىندەتتى تۇردە پايلانىپ، رەفەرەندۋمدا داۋىس بەرۋگە قاتىسامىن. مەن ەلىمىزدىڭ نەگىزگى زاڭى — قاتىپ قالعان قۇقىقتىق ۇعىم ەمەس، قوعامنىڭ ءومىرىن، ونداعى بولىپ جاتقان وزگەرىستەردى كورسەتەتىن ءتىرى تەتىك ەكەنىن ۇنەمى ايتىپ كەلەمىن. وزگەرىستەر بۇرىن دا ەنگىزىلگەن", - دەدى نۇرسۇلتان نازارباەۆ.

ول ۋاقىت تالابىنا ساي كونستيتۋتسياعا ەنگىزىلەتىن وزگەرىستەر قوعامنىڭ العا باسۋىنا، ەلدىڭ دەموكراتيالى دامۋىنا ۇلەس قوساتىن بولسا، ءار اۋىسقان ۇرپاق اتا زاڭعا وزگەرىس ەنگىزۋگە قۇقىلى ەكەنىن ايتادى.

"باسقالار سياقتى مەن دە ەلىمىزدە بولىپ جاتقان وزگەرىستەر مەملەكەتىمىز پەن حالقىمىزدىڭ مۇددەسى ءۇشىن بولۋى كەرەك دەپ ويلايمىن. مەن ءۇشىن بارىنەن دە ماڭىزدىسى وزىمنەن كەيىن حالقىما نە قالدىراتىنىم بولدى. 2019 جىلى مەن سانالى قادام جاساپ، كوپشىلىكتىڭ قارسىلىعىنا قاراماستان مەملەكەت باسشىسى قىزمەتىنەن كەتتىم. ول حالىق قولداۋىنىڭ شىڭىنا جەتكەن ۋاقىت بولاتىن. بۇعان 2015 جىلعى سوڭعى پرەزيدەنتتىك سايلاۋدا 97,7% داۋىس العانىم دالەل بولا الادى", — دەدى تۇڭعىش پرەزيدەنت.

ول وزىنەن كەيىن بيلىكتى پرەزيدەنت توقاەۆقا تاپسىرعانىن، بيلىك ءترانزيتىنىڭ جۇمساق ءوتۋى "قوعام مەن بيلىك ەليتاسى اراسىنداعى ىقتيمال قايشىلىقتى" جەڭىلدەتكەنىن مالىمدەدى.

"وسى جىلدار ىشىندە مەن ونىڭ ەلىمىزدى رەفورمالاۋ مەن ودان ءارى دامىتۋ جونىندەگى ءىس-ارەكەتتەرىن جان-جاقتى قولدادىم. بۇل جولى دا كۇمانسىز قولداۋ كورسەتەمىن", - دەدى نازارباەۆ.

Abai.kz