بۇگىن الماتى قالاسىندا «سارىارقا» جانە «باۋىرجان مومىشۇلى» مەترو بەكەتتەرى اشىلدى. بۇل تۋرالى قالا اكىمدىگىنىڭ ءباسپاسوز قىزمەتى حابارلادى.

بەكەتتەردى ىسكە قوسۋدىڭ سالتاناتتى راسىمىندە قالا اكىمى ەربولات دوساەۆ مەتروپوليتەن قۇرىلىسشىلارى مەن قىزمەتكەرلەرىنە ەرەن ەڭبەكتەرى مەن قالانىڭ قوعامدىق كولىگىن دامىتۋعا قوسقان ۇلەستەرى ءۇشىن العىس ايتتى.

- بۇل قالا مەن تۇرعىندار ءۇشىن وتە ماڭىزدى وقيعا دەپ سانايمىن. ماسەلە ءبىز كۇتىپ وتىرعان جولاۋشىلار اعىنىنىڭ 50 مىڭنان 85 مىڭعا دەيىن وسۋىندە عانا ەمەس. قالا بارىنشا جايلى بولادى، ءبارىمىزدى تولعاندىراتىن ترافيك، ەكولوگيانى جاقسارتۋ ماسەلەلەرىن شەشەمىز، – دەدى ەربولات دوساەۆ.

«باۋىرجان مومىشۇلى» مەترو مەكەتىنىڭ اشىلۋىنا قاتىسقان باتىردىڭ كەلىنى زەينەپ احمەتوۆا دا ەرەكشە تولقۋ ۇستىندە تۇرعانىن ايتىپ، ەل قاھارمانىنىڭ ەسىمى ماڭگى وشپەيتىنى تۋرالى پىكىر ءبىلدىردى.

- اتا-مارقۇم بىردە «مەن و دۇنيەلىك بولسام دا، بۇل دۇنيەدەن وتسەم دە، تىرىلەردىڭ اراسىندا جۇرەم» دەگەن ەدى. سول كەزدە ول ءسوز ماعان ءبىرتۇرلى بولىپ ەستىلگەن. ەندى قاراپ تۇرساڭىز، اۋليە ءسوزى سياقتى قالدى. ەندى قاراڭىزدار، بۇگىن قانشا ادامداردىڭ كوڭىلىندە، ءتىل ۇشىندا اتانىڭ اتى ايتىلىپ جاتىر. اتامىز ومىردەن كەتكەنىنە 40 جىل بولدى، بىراق ءالى كۇنگە دەيىن حالىق ءالى ارداقتاپ، قۇرمەتتەپ، اسپانداتىپ، كوشەلەردىڭ اتىن، مەكتەپتەردىڭ اتىن بەرىپ ءجۇر. بۇگىنگى شارا دا اتامىز ءالى تىرىلەردىڭ اراسىندا جۇرەتىنىنىڭ ءبىر بەلگىسى، – دەدى زەينەپ احمەتوۆا.

ءبىر قىزىعى، ول وسى ۋاقىتقا دەيىن الماتىدا مەترو اشىلعالى بەرى ونىمەن ءجۇرىپ كورمەگەن بولىپ شىقتى. ايگىلى باتىردىڭ ەسىمى بەرىلگەننەن كەيىن عانا مەتروعا ءبىرىنشى رەت اياق باسىپ تۇرعان ءساتى ەكەن.

ايتا كەتسەك، «سارىارقا» مەترو ستانتسياسى اۋەزوۆ اۋدانى، اباي داڭعىلى مەن التىنسارين داڭعىلىنىڭ قيىلىسىندا، باتىسقا قاراي ورنالاسقان. ال «باۋىرجان مومىشۇلى» بەكەتى اۋەزوۆ اۋدانى، اباي داڭعىلى مەن باۋىرجان مومىشۇلى كوشەسىنىڭ قيىلىسىنا جايعاستى. جاڭا مەترو ستانتسيالارى ارقىلى تاۋلىگىنە 86 مىڭ ادام قاتىناي الادى.

اكىمدىكتىڭ مالىمەتىنشە، قالادا مەترو جەلىسىن كەڭەيتۋ بويىنشا اۋقىمدى جۇمىس جالعاسادى. 2025 جىلى «قالقامان» ستانتسياسىنىڭ قۇرىلىسىن اياقتاۋ جوسپارلانىپ وتىر. مەترو جەلىسىن دامىتۋ باتىس باعىتتا «بارلىق» بازارىنا دەيىن ۇلعايادى. بۇل اۋداندار تۇرعىندارى ءۇشىن ىڭعايلى جولاۋشىلار تاسىمالىن ۇيىمداستىرۋعا مۇمكىندىك بەرەدى.

بۇعان دەيىن قالا اكىمدىگى بەكەتتەردىڭ اشىلۋى ماۋسىم ايىنا جوسپارلانىپ وتىرعانىن ايتقان بولاتىن.

دەرەككوزى: halyq-uni.kz

Abai.kz