ءبىلىم جانە عىلىم ءمينيسترى اسحات ايماعامبەتوۆ بالاباقشالارعا قويىلاتىن تالاپتاردىڭ كۇشەيتىلەتىن ايتتى. بۇل تۋرالى مينيستر رەسمي telegram ارناسىندا جاريالادى.

«ورناتىلعان بەينەكامەرالاردىڭ ارقاسىندا قوعام بالالاردىڭ قۇقىقتارى بۇزىلعان فاكتىلەر تۋرالى حاباردار وتىر. بۇل بالاباقشالارعا قويىلاتىن تالاپتاردى كۇشەيتۋ قاجەتتىلىگى تۋرالى ۇستانىمىمىزدىڭ وزەكتىلىگىن راستايدى.
ون جىلدان استام ۋاقىت بۇرىن بالاباقشالار سانىنىڭ جىلدام ءوسۋىن ىنتالاندىرۋ ءۇشىن ليتسەنزيالاۋدان، كەيىن مەملەكەتتىك باقىلاۋدان، مونيتورينگتەن جانە ولاردىڭ قىزمەتىن رەتتەۋدەن باس تارتۋ تۋرالى شەشىم قابىلداندى.

ول قانداي ناتيجە بەردى؟
جەكەمەنشىك بالاباقشالار سانى كۇرت ارتىپ، 3 جاستان 6 جاسقا دەيىنگى بالالار بىردەن 99%-عا دەيىن قامتىلدى. بۇل - جاقسى ناتيجە. الايدا بالاباقشالار سانىن كوبەيتۋگە مۇمكىندىك بولسا دا، ساپا ماسەلەسى وزەكتى بولىپ قالا بەرەدى. بالاباقشالاردىڭ جارتىسى تەحنيكالىق جانە سانيتارلىق تالاپتارعا ساي كەلمەيتىن عيماراتتاردا، بىلىكتى ماماندارسىز جانە قاۋىپتى جاعدايلاردا اشىلعان. مۇنداي فاكتىلەر جەتكىلىكتى.
ەكى جىل بۇرىن ءبىز ليتسەنزيالاۋ مەن مەملەكەتتىك باقىلاۋدى قايتارۋعا ارەكەت جاسادىق. الايدا سول كەزدە كاسىپكەرلەر پالاتاسىنىڭ، بالاباقشالار قاۋىمداستىعىنىڭ جانە بىرقاتار مەملەكەتتىك ورگاننىڭ ۇستانىمى بۇل نورمانى زاڭعا ەنگىزۋگە مۇمكىندىك بەرمەدى.
بىراق ءبىز بۇل باعىتتا جۇمىستى توقتاتپادىق. بىلتىردىڭ سوڭىندا مەملەكەتتىك اتتەستاتتاۋ جۇيەسىن ەنگىزە الدىق. اتتەستاتسيا ناتيجەسى كوڭىلدەن شىقپادى. تەكسەرىستەن وتكەن بالاباقشالاردىڭ 80%-ى مەملەكەتتىك اتتەستاتسيادان وتە المادى. اڭگىمە بالاباقشاداعى بۇلدىرشىندەرگە قولايلى جاعداي جاسالماۋى، وقۋ-تاربيە جۇمىستارىنىڭ مەملەكەتتىك ءبىلىم بەرۋ ستاندارتىنا، قاۋىپسىزدىك تەحنيكاسى، ءورت جانە سانيتارلىق نورمالاردىڭ تالاپتارعا سايكەس كەلمەۋى، تاربيەشىلەردىڭ قول كوتەرۋى جانە باسقا دا كەلەڭسىز فاكتىلەر تۋرالى بولىپ وتىر»،-دەدى ايماعامبەتوۆ.

مينيستر قازىر بەس نەگىزگى باعىت بويىنشا جۇمىس ىستەلىپ جاتقانىن ايتتى.
«1. ليتسەنزيالاۋدى قايتارۋ. بۇل ماسەلە بويىنشا دەپۋتاتتاردىڭ، قوعام مەن مەملەكەتتىك ورگانداردىڭ قولداۋىنا ءۇمىت ارتامىز.
2. جۇمىس جاعدايلارى مەن ساپاسىن تەكسەرىپ، بارلىق بالاباقشانى اتتەستاتسيالاۋدان وتكىزۋ.
3. بالاباقشالارعا مەملەكەتتىك تاپسىرىستاردى ورنالاستىرۋعا قويىلاتىن تالاپتاردى كۇشەيتۋ.
4. مەكتەپكە دەيىنگى مەكەمە قىزمەتكەرلەرىنىڭ كادرلىق الەۋەتىن ارتتىرۋ. كوللەدجدەر مەن جوو-لاردا مامانداردى دايارلاۋ ساپاسىن ارتتىرۋ.
5. مەكتەپكە دەيىنگى ءبىلىم بەرۋدىڭ جاڭا مودەلى بويىنشا باعدارلامالاردىڭ مازمۇنىن جاڭارتۋ»،-دەدى ول.

سونداي-اق، مينيستر «سوڭعى جىلدارى بالاباقشا تاربيەشىسى ماماندىعىنا وقۋعا تۇسۋگە كونكۋرس كۇرت تومەندەپ كەتكەنى، جالاقىعا بايلانىستى»،- دەيدى.

«تاربيەشىلەردىڭ جالاقىسى جىل سايىن 25%-عا وسكەنىمەن، بازالىق جالاقىنىڭ ازدىعىنان ول ءالى دە بولسا جەتكىلىكسىز بولىپ وتىر. قازىر ءبىز بىرنەشە بالاباقشادا پيلوتتىق جوبا باستادىق. بۇل جوبا بويىنشا ەكى تاربيەشى جارتى كۇن ەمەس، كۇنى بويى جۇمىس ىستەپ، ەكى ەسە جالاقى الادى. كەيىن پيلوتتىق جوبا ناتيجەسى بويىنشا شەشىم قابىلدانادى.
ارينە، جەكەمەنشىك بالاباقشا اشاتىن كاسىپكەرلەردى قولداۋ ماڭىزدى ەكەنىن تۇسىنەمىز.

بىراق ءبىزدىڭ جۇمىسىمىزداعى باستى باعىت – بالالاردىڭ قاۋىپسىزدىگى جانە ولارعا قولايلى ءارى ساپالى جاعداي جاساۋ. مۇنداي ەرەجەلەر اتا-انالار ءۇشىن ماڭىزدى جانە ادال كاسىپكەرلەر ءۇشىن پايدالى دەپ ەسەپتەيمىن»-,دەپ جازدى ايماعامبەتوۆ.

Abai.kz