داريعا نازارباەۆانىڭ بۇرىنعى قۇداسى، وليگارح قايرات بورانباەۆقا قاتىسى بار دەلىنگەن  "فيتوحيميا" كەشەنى مەملەكەت مەنشىگىنە قايتارىلىپ بەرىلەدى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ مالىمدەدى.

"بۇرىن قاراعاندى فارماتسەۆتيكالىق كلاستەرىنە بەرىلگەن" فيتوحيميا" عىلىمي - وندىرىستىك كەشەنى مەملەكەتتىك مەنشىككە قايتارىلادى", - دەدى مينيستر.

ونىڭ ايتۋىنشا، ينستيتۋتتىڭ ماڭىزى الەۋەتى زور.

"ىشكى اۋديت قىزمەتىن تەكسەرۋ مامىلەنىڭ مەملەكەت ءۇشىن ءتيىمسىز ەكەنىن كورسەتتى، مۇلىكتىك كەشەننىڭ قۇنىن باعالاۋ، ءبولىپ تولەۋدى ۇسىنۋ بويىنشا ماسەلەلەر تۋىندادى. سوندىقتان مەملەكەت مەنشىگىنە قايتارۋعا باستاماشىلىق جاسالدى. ءتيىستى قۇجاتقا قول قويىلدى، قاجەتتى راسىمدەر جۇرگىزىلۋدە. قاراعاندىداعى ساياباق جەر تەلىمىنىڭ ءبىر بولىگىن قالالىق ورتالىق ساياباقتىڭ ءبىر بولىگى رەتىندە مەملەكەت مەنشىگىنە قايتارۋ ماسەلەسى قاراستىرىلۋدا", - دەدى ايماعامبەتوۆ.

ايتا كەتەيىك، قاراعاندى فارمكلاستەرىنىڭ قۇرامىنا قايرات بورانباەۆتىڭ باقىلاۋىنداعى قاراعاندى فارماتسەۆتيكالىق زاۋىتى كىرەدى.

15 ناۋرىزدا قارجى مونيتورينگى اگەنتتىگىنىڭ قىزمەتكەرلەرى بورانباەۆتى ۇستادى.16 ناۋرىزدا ول نۇر-سۇلتانعا جەتكىزىلگەن بولاتىن. ال، 14 ساۋىردە سوتتىڭ "AlanParking" جشس ديرەكتورى مۇحتار بازارباەۆتى قاماۋعا الۋعا سانكتسيا بەرگەنى بەلگىلى بولدى.

AlanParking - بورانباەۆتىڭ يەلىگىندەگى "RR2" جشس باقىلاۋىنداعى اقىلى تۇراق وپەراتورى. 18 ساۋىردە قايرات بورانباەۆقا قاتىسى بار "الماتى سپەتستەحپاركينگ سەرۆيس" جشس ديرەكتورى مارات پرىنبەكوۆ قاماۋعا الىندى. 25 ساۋىردە بورانباەۆ فيرمالارىنىڭ باقىلاۋىندا بولعان الماتىنىڭ بىرنەشە اقىلى اۆتوتۇراقتارى مەملەكەتكە قايتارىلىپ بەرىلگەن بولاتىن.

قايرات بورانباەۆ – «قايرات» فۋتبول كلۋبىنىڭ يەسى، قازاقستان رەسپۋبليكاسى پاراليمپيادا كوميتەتىنىڭ پرەزيدەنتى، ۇلتتىق وليمپيادالىق كوميتەتتىڭ (ۇوك) پاراليمپيادالىق سپورتتى دامىتۋ جونىندەگى ۆيتسە-پرەزيدەنتى، ۋەفا ادال ويىن جانە الەۋمەتتىك جاۋاپكەرشىلىك كوميتەتىنىڭ مۇشەسى.

سونىمەن قاتار ول «Fitnation» فيتنەس كلۋبىنىڭ، «راحات پالاس»، «Comfort Hotel Astana» قوناق ۇيلەرىنىڭ يەسى، «Esentai Mall»، «Esentai Tower» بيزنەس ورتالىعىن، «المالى» ساۋدا ورتالىعىن، لاتۆياداعى «Jurmala Golf Club & Hotel» قوناقۇيىن سەرىكتەسىمەن ءبولىسىپ باسقارادى. «McDonalds» تاماقتانۋ ورنىنىڭ قازاقستانداعى جانە رەسەيدەگى فرانچايزينگ يەسى.

Abai.kz