2 ماۋسىمدا تۇركىمەنستاننان 490 قانداس قازاقستانعا كوشىپ كەلۋى ءتيىس بولعان، الايدا ولار كەلمەدى. بۇل تۋرالى تۇسىنىكتەمە بەرگەن قازاقستان سىرتقى ىستەر مينيسترلىگى كوشتىڭ ماۋسىم ايىنىڭ سوڭىنا شەگەرىلگەنىن ايتقان دەپ جازادى ازاتتىق.

 "مارشرۋت پەن باسقا دا ۇيىمداستىرۋ ماسەلەلەرىن ەگجەي-تەگجەي قوسىمشا كەلىسۋ قاجەتتىلىگىنە بايلانىستى ەتنيكالىق قازاقتاردى جونەلتۋدى ماۋسىم ايىنىڭ سوڭىنا اۋىستىرۋ تۋرالى قازاقستان جانە تۇركىمەن تارابى بىرلەسىپ شەشىم قابىلدادى",-  دەدى مينيسترلىكتىڭ رەسمي وكىلى ايبەك سمادياروۆ.

2 ماۋسىمدا تۇسكە دەيىن ماڭعىستاۋ وبلىسى اكىمدىگىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى اسەت شوپانوۆ كوش "بەلگىسىز مەرزىمگە شەگەرىلدى" دەگەن ەدى.

«بەلگىسىز ۋاقىتقا شەگەرىلدى. ءبىز ونىڭ ۋاقىتىن بىلمەيمىز. ناقتى سەبەبىن دە بىلمەيمىز”،- دەيدى اسەت شوپانوۆ.

مامىر ايىنىڭ باسىندا جەرگىلىكتى اقپارات اگەنتتىكتەرى 2 ماۋسىمدا 490 قازاق تۇركىمەنستاننان قازاقستانعا ورالادى دەپ حابارلاعان ەدى. مۇنداي شەشىمدى 11 مامىردا تۇركىمەنستان اۋرۋدىڭ تاراۋىمەن كۇرەس توتەنشە كوميسسياسى قازاقستان ەلشىلىگىنىڭ وتىنىشىمەن قابىلداعان. اقپاراتقا قاراعاندا، جولاۋشىلاردى تۇركىمەنستاننىڭ تەمىر جول كومپانياسى تۇركىمەنباشىدان "بولاشاق" ستانتسياسىنا جەتكىزىپ، ودان ءارى قاراي قازاقستاندىق تەمىر جول كومپانياسى ولاردى جاڭاوزەنگە جەتكىزۋى ءتيىس بولعان. الايدا ولاردى جەتكىزەتىن كۇن قارساڭىندا تۇركىمەن قازاقتار كوشىنىڭ شەگەرىلگەنى حابارلاندى. ولاردى قازاقستاندا كۇتىپ العىسى كەلەتىن تۋىستارىنا ەشكىم ەشتەڭە ايتپاعان. كەيبىرى ولاردى كۇتىپ الۋ ءۇشىن ماۋسىم باسىندا جاڭاوزەنگە دە بارعان.

"وتانداستار" قورىنىڭ مالىمەتىنشە، بىلتىر اقپاندا تۇركىمەنستاننان – 153 قازاق، مامىر ايىندا - 256, شىلدەدە 241 قانداس قازاقستانعا ورالعان. ولاردىڭ باسىم بولىگى ماڭعىستاۋ وبلىسىنا، از بولىگى جامبىل وبلىسى مەن الماتى قالاسىنا قونىستانعان.

قازاقستان 1991 جىلدان باستاپ شەتەلدەگى قازاقتاردى ەلگە اكەلە باستاعان. سودان بەرى ەلگە ءبىر ميلليوننان استام قازاق ورالعان.

Abai.kz