قر سىبايلاس جەمقورلىققا قارسى ءىس-قيمىل اگەنتتىگى بولات نازارباەۆتىڭ ۇلى ەربول نازارباەۆتىڭ قىزمەتىنەن بوساتىلۋىنا قاتىستى Orda.kz رەداكتسياسىنىڭ سۇراۋ سالعان حاتىنا جاۋاپ كەلىپتى، دەپ جازادى Dalanews.kz سايتى.

Orda.kz سايتى قۇزىرلى ورگاننان ەربول نازارباەۆتىڭ قاندى قاڭتار وقيعاسىنان قانداي دا ءبىر قاتىسى بار، جوعىن انىقتاۋعا تىرىسقان.

«ەربول بولاتۇلى نازارباەۆ 14 ءساۋىر كۇنى ءوزىنىڭ قالاۋى بويىنشا قىزمەتىنەن كەتتى»، – دەپ جاۋاپ بەرگەن  قر سىبايلاس جەمقورلىققا قارسى ءىس-قيمىل اگەنتتىگىنىڭ اپپارات باسشىسى ارمان حاسەنوۆ.

سوعان قاراعاندا ەربول نازارباەۆتىڭ قاندى قاڭتارعا ەشقانداي قاتىسى بولماۋى مۇمكىن.

ەربول نازارباەۆ 2015 جىلدان بەرى قر سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى مەن ورتالىق اپپاراتىندا ءتۇرلى قىزمەتتەر اتقارعانىن بىلەمىز. ءبىر سوزبەن ايتساق، ەربول نازارباەۆ بەسىكتەن بەلى شىقپاي جاتىر انتيكوردىڭ جاۋاپتى قىزمەتكەرلەرىنىڭ ءبىرى بولعانى كوپشىلىك ءۇشىن قىزىق بولىپ تۇرعانى انىق.

Orda.kz سايتىنىڭ جۋرناليستەرى ەربول نازارباەۆتىڭ انتيكوردا جاۋاپتى قىزمەتتى اتقارعان كەزدە وعان العان ءبىلىمى قانشالىقتى سايكەس بولعانىن بىلۋگە تىرىسقاندا ارمان حاسەنوۆ «قۇقىق قورعاۋ ورگاندارىنىڭ قىزمەتى تۋرالى» زاڭنىڭ 42 بابى 5 تارماعى بويىنشا مەملەكەتتىك قۇپياعا جاتاتىنىن ايتىپتى.

وسىلايشا ەربول نازارباەۆتىڭ انتيكوردا جاۋاپتى قىزمەت اتقارۋىنا قانداي ءبىلىمى مەن بىلىكتىلىگى جول اشقانىن قۇپيا كۇيىندە قالدى.

Abai.kz