«مەملەكەت باسشىسى ءال-فارابي اتىنداعى وقۋشىلار سارايىنىڭ عيماراتىندا ورنالاسقان سايلاۋ ۋچاسكەسىنە بارىپ، رەسپۋبليكالىق رەفەرەندۋمدا داۋىس بەردى»،-دەپ حابارلايدى اقوردا.

جالپىۇلتتىق رەفەرەندۋم ارقىلى كونستيتۋتسياعا وزگەرىستەر مەن تولىقتىرۋلاردىڭ ەنگىزىلۋى – بۇگىنگى اسا ماڭىزدى شارانىڭ باستى ەرەكشەلىگى. بۇعان دەيىن اتا زاڭعا وزگەرىستەر مەن تولىقتىرۋلار ەنگىزۋ جونىندەگى شەشىمدى پارلامەنت قابىلدايتىن.

قاسىم-جومارت توقاەۆ داۋىس بەرگەننەن كەيىن وتاندىق بۇقارالىق اقپارات قۇرالدارىنىڭ وكىلدەرى ءۇشىن بريفينگ وتكىزدى. مەملەكەت باسشىسى قازاقستاندىقتاردى ءوتىپ جاتقان رەفەرەندۋممەن قۇتتىقتادى.

«بۇگىن ەلىمىز ءۇشىن، شىن مانىندە، تاريحي كۇن. حالقىمىز بەتبۇرىستى شەشىم قابىلداماق. ەشقانداي ماجبۇرلىك جوق. رەفەرەندۋم جوعارى دەڭگەيدە ۇيىمداستىرىلعان»، – دەدى قازاقستان پرەزيدەنتى.

پرەزيدەنت قاسىم-جومارت توقاەۆ ءوتىپ جاتقان رەفەرەندۋم ەلدە قاڭتار ايىندا بولعان تارتىپسىزدىكتەردىڭ قايتالانباۋىنىڭ كەپىلى بولاتىنىن مالىمدەدى.

ء"بىز قايعىلى قاڭتاردىڭ قايتالانبايتىنىنا سەنىمدىمىز. ايتپاقشى، بۇگىنگى رەفەرەندۋم-وسىنىڭ كەپىلى. ءبىز ودان ءتيىستى ساباق الدىق", - دەدى توقاەۆ جۋرناليستەرگە بەرگەن جاۋابىندا.

ونىڭ ايتۋىنشا، قاڭتاردا بولعان تارتىپسىزدىكتەردى تەرگەۋ ءۇشىن حالىقارالىق ساراپشىلاردى شاقىرۋدىڭ قاجەتى جوق.

"تەرگەۋدى ۋاكىلەتتى ورگاندار وتە مۇقيات، ەگجەي-تەگجەيلى جۇرگىزەتىن بولادى. قول جەتىمدى بارلىق ماتەريالداردى باس پروكۋراتۋرا جاريالايتىن بولادى، قوعامنان ەشتەڭە جاسىرىلىپ قالمايدى. ءبىز ءبارىن اشىق ءارى  جوعارى كاسىبي دەڭگەيدە جۇرگىزەمىز، سوندىقتان حالىقارالىق ساراپشىلاردى شاقىرۋدىڭ قاجەتى جوق دەپ ويلايمىن", - دەپ اتاپ ءوتتى پرەزيدەنت.

ول، سونداي-اق، كونستيتۋتسياعا ەنگىزىلەتىن وزگەرىستەر بويىنشا الدا اتقارار ماڭىزدى شارۋالاردىڭ كۇتىپ تۇرعانىن ايتتى.

Abai.kz