6 ماۋسىمدا ۋكراينا جۋرناليستەر كۇنىن اتاپ ءوتتى. الەۋمەتتىك جەلىدە مالىمدەمە جاساعان مينيستر، قازىر جۋرناليستەر سوعىس جاعدايىندا "اقپاراتتىق مايداننىڭ الدىڭعى شەبىندە" جۇمىس ىستەپ جاتىر دەپ اتاپ ءوتتى.
"4 ايدىڭ ىشىندە 32 ارىپتەسىمىزدەن ايىرىلدىق، سوڭعى سەگىز جىلدا ودان دا كوپ جۋرناليست قازا تاپتى. سىزدەر – باتىرسىزدار. سىزدەردىڭ ءرولىڭىز، ەرجۇرەكتىگىڭىز جانە ىسىڭىزگە ادالدىعىڭىزعا باعا جەتپەيدى", - دەپ جازدى تكاچەنكو.
30 مامىردا BFMTV مەديا كومپانياسىنىڭ فرانتسۋز ءجۋرناليسى فرەدەريك لەكلەر-يمحوفف قايتىس بولدى. ول لۋگانسك وبلىسىندا بەيبىت تۇرعىنداردى ەۆاكۋاتسيالاۋ پروتسەسىن ءتۇسىرىپ جۇرگەن. جۋرناليست بەيبىت تۇرعىندار وتىرعان اۆتوبۋستى اتقىلاعان كەزدە قايتىس بولعان.
29 ساۋىردە كيەۆتە رەسەيلىك زىمىرانداردىڭ اتقىلاۋىنان ازاتتىقتىڭ ۋكراين قىزمەتىنىڭ ءتىلشىسى ۆەرا گيريچ كوز جۇمدى. زىمىران ول تۇرعان ۇيگە قۇلاعان. 23 ساۋىردە كيەۆتە The Insider باسىلىمىنىڭ ءتىلشىسى وكسانا باۋلينا رەداكتسيانىڭ تاپسىرماسىن ورىنداپ جۇرگەن كەزدە، باقيلىق بولدى.
13 ناۋرىزدا كيەۆ تۇبىندەگى گۋتا اۋىلىندا ءفوتوتىلشى ماكس لەۆين ءىز-ءتۇسسىز جوعالىپ كەتتى. ونىڭ دەنەسىن ءساۋىر ايىندا تاپقان. بۇدان بولەك كوپتەگەن جۋرناليست ۇستالىپ، ازاپتالعان.
دەرەكتى فيلم تۇسىرەتىن ليتۆالىق دوكۋمەنتاليست مانتاس كۆەداروۆيچيۋس 2 ساۋىردە ماريۋپولدا قايتىس بولدى. ول سوعىس جايلى جاڭادان دەرەكتى فيلم تۇسىرمەك بولعان. رەسەي اسكەرىنىڭ وعىنان كوز جۇمدى.
"شەكاراسىز تىلشىلەر" ۇيىمى حالىقارالىق سوتقا رەسەي ارمياسىنا قارسى اسكەري قىلمىس جاسادى دەگەن ايىپپەن، بىرنەشە شاعىم ءتۇسىردى.
Abai.kz
