پرەزيدەنت قاسىم-جومارت توقاەۆ مەملەكەت جانە قوعام قايراتكەرى مىرزاتاي جولداسبەكوۆتى 85 جاسقا تولۋىمەن قۇتتىقتاپ، جەدەلحات جولدادى.

مەملەكەت باسشىسى قازاق حالقى مىرزاتاي جولداسبەكوۆتى مەملەكەت جانە قوعام قايراتكەرى، عالىم، قارىمدى قالامگەر رەتىندە جاقسى بىلەتىنىن جانە قۇرمەتتەيتىنىن اتاپ ءوتتى.

"ۇستازدىقتان باستالعان ەڭبەك جولىڭىزدا مينيستر، پرەمەر-ءمينيستردىڭ ورىنباسارى، ەلشى، ۋنيۆەرسيتەت رەكتورى، پرەزيدەنتتىك ورتالىقتىڭ باسشىسى سياقتى جاۋاپتى لاۋازىمداردى ابىرويمەن اتقارىپ، ەلىمىزدىڭ مارتەبەسى مەن بەدەلىنىڭ ارتا تۇسۋىنە اتسالىستىڭىز. ادەبي قازىنامىزدىڭ قاينار بۇلاعى بولعان اقىن-جىراۋلاردىڭ شىعارماشىلىعىن جاڭا قىرىنان كورسەتىپ، قازاق ءۇشىن ايتىس ونەرىنىڭ ايرىقشا ءرول اتقاراتىنىن دالەلدەپ بەردىڭىز. ورحون-ەنيسەي جازبا ەسكەرتكىشتەرىن تەرەڭ زەردەلەدىڭىز", – دەپ جازىلعان قۇتتىقتاۋ جەدەلحاتىندا.

توقاەۆ سونداي-اق قالامگەردىڭ "ەجەلگى ادەبيەت نۇسقالارى", "كۇلتەگىن", "اسىل ءسوزدىڭ اتاسى", "كىسىلىك كىتابى", "تاڭعالامىن ءومىردىڭ عاجابىنا" جانە باسقا دا كىتاپتارىڭى ۇلتتىق قۇندىلىقتارىمىزدى دارىپتەۋ مەن جاڭعىرتۋدىڭ جارقىن ۇلگىسى ەكەنىن باسا ايتقان.

"الداعى ۋاقىتتا دا قوعامدىق-ساياسي ىستەرگە بەلسەندى اتسالىسىپ، ەل-جۇرتتىڭ شىنايى قۇرمەتىنە بولەنىپ، مەرەيىڭىزدىڭ ۇستەم بولا بەرۋىنە تىلەكتەستىك بىلدىرەمىن", – دەپ تۇيىندەدى مەملەكەت باسشىسى.

مىرزاتاي جولداسبەكوۆ قازاق ادەبيەتىنە ولشەۋسىز ۇلەس قوسىپ جاتقان ءىرى تۇلعا. ونىڭ شىعارمالارى مەملەكەتشىلدىك، وتىندى ءسۇيۋ مەن ەلدى قۇرمەتتەۋ، تاريحتى بىلۋگە شاقىرادى جانە جاس ۇرپاقتىڭ ساناسىنا اسىل قاسيەتتەردى ناسيحاتتاۋعا سەبەپكەر.

Abai.kz