قازاقستاندىق وقۋشىلار شەتەلدىك وليمپيادادا ەلدىڭ نامىسىن قورعادى. ماتەماتيكا ءپانى بويىنشا بولعان بالقانداعى جارىستا وقۋشىلار 2 كۇمىس جانە 4 قولا جەڭىپ الدى.

وسىلايشا، ەلدىڭ ۇلتتىق قۇراماسى الدىڭعى جىلدىڭ ناتيجەلەرىن جوعارى دەڭگەيگە كوتەردى. ياعني 2021 جىلعا قاراعاندا ەل قورجىنىنا ءبىر مەدال ارتىق ءتۇستى. زياتكەرلىك جارىستار 4-9 مامىر ارالىعىندا لارناكا قالاسىندا (كيپر) وفلاين فورماتتا ءوتتى. وسى جىلى وليمپياداعا 16 ەلدەن 100-گە جۋىق وقۋشى قاتىستى. ولاردىڭ قاتارىندا البانيا، بوسنيا جانە گەرتسەگوۆينا، بولگاريا، كيپر، ماكەدونيا، گرەتسيا، مولدوۆا رەسپۋبليكاسى، چەرنوگوريا رەسپۋبليكاسى، رۋمىنيا، سەربيا جانە ت.ب. بار.

«جىل سايىن سايىسقا 6 ادامنان قۇرالعان قازاقستان قۇراماسى قاتىسادى. بيىل ەل نامىسىن الماتى، نۇر-سۇلتان، قوستاناي، اتىراۋ جانە اقتاۋ قالالارىنىڭ وقۋشىلارى قورعادى. سايىستا بالالار ماتەماتيكادان وليمپيادا تاپسىرمالارىن وتە قىسقا مەرزىمدە شەشۋى كەرەك بولدى. بۇعان دەيىن بالالار جىلى اياسىندا دارىندى وقۋشىلاردى قولداۋ ماقساتىندا رەسپۋبليكا كولەمىندە ءتۇرلى دەڭگەيدەگى وليمپيادالاردى وتكىزگەن بولاتىنبىز. وليمپيادانى وتكىزۋ پروتسەسى اۆتوماتتاندىرىلدى. بۇل وليمپيادالاردى اۋداندىق دەڭگەيدەن رەسپۋبليكالىق دەڭگەيگە دەيىن بارىنشا اشىق جانە ترانسپارەنتتى وتكىزۋگە مۇمكىندىك بەردى. بالقان وليمپياداسى دايىندىقتىڭ ءتيىمدى ءادىسى جانە ونىڭ وقۋشىلارىمىزعا نەگىزگى حالىقارالىق ماتەماتيكالىق وليمپياداعا (IMO) دايىندالۋعا كومەكتەسەتىنىن اتاپ وتكىم كەلەدى»، - دەدى «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى تيمۋر نۇركەشەۆ.

ايتا كەتەيىك، بىلتىر قازاقستاندىق وقۋشىلار 1 كۇمىس جانە 4 قولا مەدال جەڭىپ العان بولاتىن.

Abai.kz