ورتالىق رەفەرەندۋم كوميسسياسى (ورك) قازاقستان كونستيتۋتسياسىنا ەنگىزىلەتىن وزگەرىستەر جونىندەگى رەفەرەندۋمنىڭ اقىرعى قورىتىندىسىن جاريالادى. كوميسسيا مالمەتىنە قاراعاندا، رەفەرەندۋمدا داۋىس بەرگەندەردىڭ 77,18 پايىزى وزگەرىستەردى قولداعان. ورك كەلتىرگەن مالىمەتتەر الدىن الا جاسالعان قورىتىندىمەن نەگىزىنەن ساي كەلەدى.

اقىرعى قورىتىندى مەن الدىن الا قورىتىندىنىڭ جالعىز ايىرماسى — وزگەرىستەردى قولداۋشىلار سانىندا عانا. اقىرعى قورىتىندىعا قاراعاندا، رەفەرەندۋمدا 6 ميلليون 163 مىڭ 516 ادام وزگەرىستەردى قولداپ داۋىس بەرگەن. الدىن الا قورىتىندىدا بۇل تسيفر 6 ميلليون 163 مىڭ 863 ادام بولعان.

رەفەرەندۋم قورىتىندىسى داۋىس بەرگەندەردىڭ 18,66 پايىزى، ياعني 1 ميلليون 490 مىڭ 470 ادام قارسى بولعانىن كورسەتكەن.

7 ماۋسىمداعى مالىمەتتەرگە قاراعاندا، رەفەرەندۋمعا داۋىس بەرۋگە قۇقىعى بار ازاماتتاردىڭ 68,05 پايىزى قاتىسقان. داۋىس بەرۋگە قۇقىعى بار رەسپۋبليكا ازاماتتارىنىڭ جالپى سانى – 7 ميلليون 985 مىڭ 769 ادام.

ورك توراعاسى نۇرلان ءابدىروۆ كونستيتۋتسياعا ەنگىزىلەتىن وزگەرىستەر رەفەرەندۋمنىڭ اقىرعى قورىتىندىسى جاريالانعان كۇننەن باستاپ كۇشىنە ەنەتىنىن مالىمدەدى.

5 ماۋسىمداعى رەفەرەندۋم كەزىندە تاۋەلسىز باقىلاۋشىلار ءتۇرلى زاڭ بۇزۋشىلىقتار بولعانىن حابارلاعان. رەفەرەندۋمنان كەيىن قازاقستان پرەزيدەنتى قاسىم-جومارت توقاەۆ "داۋىس بەرۋ بارىسى دەموكراتيا تالاپتارىنا ساي ءوتتى. ەشقانداي ماجبۇرلىك بولعان جوق" دەپ حالىققا ۇندەۋ جاساعان.

Abai.kz