قازاقستاندا بيلىك وكىلىنە باعىنباعاندارعا قاتىستى جاۋاپكەرشىلىك كۇشەيۋى مۇمكىن. بۇل تۋرالى تengrinews.kz سايتىنا سىلتەمە جاساپ Abai.kz حابارلايدى.

"قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇقىق قورعاۋ قىزمەتىن وتكەرۋ ءتارتىبىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىن تانىستىرا وتىرىپ، دەپۋتات گۇلنار بيجانوۆا ماجىلىستەگى وتىرىس بارىسىندا قاڭتار وقيعاسى "ازاماتتاردىڭ، ونىڭ ىشىندە قىزمەتكەرلەردىڭ جانە ولاردىڭ تۋىستارىنىڭ قۇقىعى مەن بوستاندىعىن قورعاۋ باسىمدىعىمەن قۇقىق قورعاۋ جۇيەسىن رەفورمالاۋ بويىنشا شارالار قابىلداۋ قاجەتىن" كورسەتكەنىن اتاپ ءوتتى.

قىلمىستىق كودەكستە تج جاعدايىنداعى جاپپاي تارتىپسىزدىكتەر كەزىندە جانە تەرروريزمگە قارسى وپەراتسيا جۇرگىزۋ ايماعىندا بيلىك وكىلىنە باعىنباعانى، وعان قاتىستى زورلىق-زومبىلىق قولدانعانى، ومىرىنە قول سۇققانى ءۇشىن جاۋاپكەرشىلىك كۇشەيتىلەدى. سونداي-اق، وسى جاعدايلاردا قاۋىپ پەن زورلىق-زومبىلىق ءۇشىن جاۋاپكەرشىلىك كۇشەيەدى.

"ەكىنشى بلوك قۇقىق قورعاۋ ورگاندارىنىڭ شەشىم قابىلداۋداعى دەربەستىگىن نىعايتۋ جانە باسشىلار جاۋاپكەرشىلىگىن ارتتىرۋ ماسەلەلەرىن قاراستىرادى. ءبىز بىرقاتار زاڭعا، اتاپ ايتقاندا قىلمىستىق جانە قىلمىستىق ءىس جۇرگىزۋ كودەكستەرىنە، "توتەنشە جاعداي تۋرالى", "اسكەري جاعداي تۋرالى", "ۇلتتىق ۇلان تۋرالى" جانە باسقا دا زاڭدارعا وزگەرىستەر ەنگىزۋدى ۇسىنامىز. جاڭا قۇرام ءۇشىن قىلمىستىق جاۋاپكەرشىلىك ەنگىزىلىپ جاتىر", - دەدى بيجانوۆا.

كەلەسى 370-2 باپ - "قۇقىق قورعاۋ ورگانى نەمەسە ارناۋلى مەملەكەتتىك ورگان قىزمەتكەرىنىڭ قىزمەتتىك مىندەتتەرىن ورىنداۋدان باس تارتۋى نەمەسە جالتارۋى". وندا 120 اەك مولشەرىندە ايىپپۇل سالۋدان ءۇش جىلدان ون جىلعا دەيىنگى مەرزىمگە باس بوستاندىعىنان ايىرۋ تۇرىندەگى نەعۇرلىم قاتاڭ جازا قاراستىرىلعان.

"452-1-باپقا توقتالعىم كەلەدى - "باسشىنىڭ قىزمەتتەگى ارەكەتسىزدىگى". بۇل باپ بويىنشا توتەنشە جاعداي كەزىندە بەيبىت حالىقتىڭ ءومىرى مەن دەنساۋلىعىنا تىكەلەي قاتەر تونگەن، عيماراتتاردى باسىپ الۋ، مۇلىكتى تالان-تاراجعا سالۋ، توناۋ بولىپ جاتقان جاعدايدا جەرگىلىكتى باسشىلاردىڭ ارەكەتسىزدىگى ءۇشىن جەتى جىلعا دەيىنگى مەرزىمگە باس بوستاندىعىن شەكتەۋ نە سول مەرزىمگە باس بوستاندىعىنان ايىرۋ تۇرىندەگى قىلمىستىق جاۋاپتىلىق كوزدەلەدى. مۇنىڭ ءبارىن قاڭتاردا بايقادىق. بۇل جاۋاپسىزدىق جانە قىلمىس. اسىرەسە، لاڭكەستىككە ۇلاسقان جاپپاي تارتىپسىزدىكتەر كەزىندە", - دەدى دەپۋتات.

Abai.kz