قازاقستاننىڭ ءوندىرىس قاۋىپسىزدىگى بويىنشا كوميتەت مالىمەتىنشە، كومپانيا بىلتىر شاحتاداعى اپاتتان كەيىن انىقتالعان ەرەجە بۇزۋلاردى جويعان ەمەس.
"تەكسەرۋ قورىتىندىسىندا كومپانياعا 100 ايلىق ەسەپتىك كورسەتكىش كولەمىندە ايىپپۇل سالىندى. زاڭعا سايكەس، ەگەر كومپانيا ايىپپۇلدى جەتى تاۋلىك ىشىندە تولەسە، بۇل سومانىڭ جارتىسى عانا الىنادى", – دەدى كوميتەتتىڭ قاراعاندى وبلىستىق دەپارتامەنتتىڭ توراعا ورىنباسارى كەنگىرباي ەسەنەەۆ.
ونىڭ سوزىنشە، "اباي" شاحتاسىندا كومىر مەن گازدىڭ، سونىمەن بىرگە كومىر شاڭىنىڭ اياق استىنان جارىلىپ كەتۋ قاۋىپى وتە جوعارى. شاحتانىڭ ماسسا تەمپەراتۋراسىن انىقتايتىن جابدىقتار جوق; عىلىمي ينستيتۋتتارمەن بىرلەسىپ گەولوگيالىق شارتتاردى بولجاۋدىڭ مەتودولوگياسى جاسالىنباعان; كومپيۋتەرلىك تەحنيكالار، بولجاۋ جانە گەولوگيالىق بارلاۋ قىزمەتتەرى جاڭارتىلعان ەمەس; گەولوگيالىق مودەلدەۋ جانە سەيسميكالىق بارلاۋ ىستەرى جۇرگىزىلگەن ەمەس; كومىر شاڭىنىڭ قۇرامىن انىقتايتىن جابدىقتار ساتىپ الىنعان ەمەس.
2021 جىلى قاراشادا "اباي" شاحتاسىندا اپاتتى جاعداي بولىپ، التى كەنشى قايتىس بولدى.
"ارسەلور ميتتال تەمىرتاۋ" كومپانياسى قاراعاندى وبلىسىنداعى بىرنەشە شاحتاعا جانە تەمىرتاۋ قالاسىنداعى مەتاللۋرگيا كومبيناتىنا يەلىك ەتەدى.
Abai.kz
