قورعانىس مينيسترلىگى «قازاقستان رەسپۋبليكاسىنىڭ اسكەري دوكتريناسىن بەكىتۋ تۋرالى» قازاقستان رەسپۋبليكاسى پرەزيدەنتىنىڭ 2017 جىلعى 29 قىركۇيەكتەگى № 554 جارلىعىنا وزگەرىس ەنگىزۋ تۋرالى» پرەزيدەنت جارلىعىنىڭ جوباسىن ازىرلەدى. 

مەملەكەت باسشىسىنىڭ تاپسىرماسى بويىنشا قورعانىس ۆەدومستۆوسى مۇددەلى مەملەكەتتىك ورگاندارمەن بىرلەسىپ، نەگىزگى قۇجاتتى جاڭا بولمىسقا بەيىمدەۋگە باعىتتالعان قولدانىستاعى اسكەري دوكترينانى قايتا قاراۋدى جۇزەگە اسىرۋدا. قۇجاتقا وزگەرىستەر ەنگىزۋدى وسى جىلدىڭ سوڭىنا دەيىن اياقتاۋ جوسپارلانىپ وتىر. ۇسىنىلىپ وتىرعان وزگەرىسكە نازار اۋدارساق، كەلەسى ۇعىمداردى ەنگىزۋ جاعىن قاراستىرادى:

داعدارىستى جاعداي – ەل اۋماعىنداعى نەمەسە ونىڭ بولەك جەرگىلىكتى جەرىندەگى الەۋمەتتىك، تابيعي جانە تەحنوگەندىك سيپاتتاعى توتەنشە جاعداي تۋىنداعان سالدارىنان قالىپتى قىزمەت ەتۋ رەجيمىنىڭ بۇزىلۋىمەن بايلانىستى جاعداي;

رەزەرۆتەگى اسكەري قىزمەت – رەزەرۆتە بولاتىنداردىڭ اسكەري جيىنداردان جانە ارنايى دايارلىقتان ءوتۋىن قامتيتىن اسكەري قىزمەتتىڭ ەرەكشە ءتۇرى;

8. قازاقستان رەسپۋبليكاسىنا تونەتىن اسكەري قاتەرگە اكەپ سوقتىرۋى مۇمكىن نەگىزگى جاعدايلار پۋنكتىنە كەلەسى وزگەرىستەر مەن ۇعىمداردى ەنگىزۋدى نەگىزدەيدى:

حالىقارالىق قاتىناستاردىڭ جالپى كۇردەلەنۋى اياسىندا جاھاندىق جانە وڭىرلىك دەڭگەيدە ەكونوميكالىق جانە ساياسي ىقپال ەتۋ سالالارىن كەڭەيتۋگە ۇمتىلىستا الەمدىك جانە وڭىرلىك «دەرجاۆالار» اراسىنداعى قايشىلىقتاردىڭ كۇشەيۋى;

الەمدە جاپپاي قىرىپ-جوياتىن قارۋ اۋقىمىنىڭ ورىستەۋ، سونداي-اق جاڭا فيزيكالىق قاعيداتتار نەگىزىندە جاسالعان جاپپاي اسەر ەتەتىن قارۋدىڭ جاسالۋى;

قۇرىلىمدى بۇزاتىن كۇشتەردىڭ جاپپاي قىرىپ-جوياتىن قارۋعا، كادىمگى قارۋ-جاراققا، وق-دارىگە، جارىلعىش جانە باسقا دا قۇرالدارعا، ولاردى شىعارۋ تەحنولوگياسىنا قولجەتىمدىلىگىن شەكتەۋ بويىنشا جۇرگىزىلەتىن شارالار تيىمدىلىگىنىڭ تومەندەۋى;

مەملەكەتتەگى جاعدايدى تۇراقسىزداندىرۋعا باعىتتالعان اقپاراتتىق-ناسيحاتتاۋ جۇمىسىن، اتاپ ايتقاندا اقپاراتتىق وپەراتسيالار (كيبەرشابۋىل) جۇرگىزۋ، حالىقارالىق ارەنادا تەرىس احۋالدى قالىپتاستىرۋ;

قازاقستان رەسپۋبليكاسىنىڭ جانە شەكارالاس مەملەكەتتەر اۋماعىندا قۇرىلىمدى بۇزاتىن ەلەمەنتتەردى جاسىرىن دايارلاۋ;

عارىشتىق كەڭىستىكتە باسىم ءتۇسۋ ءۇشىن كۇرەسۋدى كۇشەيتۋ;

شەكارا قاۋىپسىزدىگىنە ىقپال ەتەتىن مەملەكەتتىك شەكاراداعى جاعداي بولىپ تابىلادى.

جالپى جيىنتىعى 67 ءتۇرلى تولىقتىرۋلار مەن وزگەرتۋلەر، الىپ تاستاۋلار ۇسىنىلعان. قۇجاتتىڭ نۇسقاسى اشىق نپا-دا جاريالانىپ، 24 ماۋسىمعا دەيىن اشىق تالقىلاۋعا ۇسىنىلىپ وتىر. جالپى الەمدىك گەوساياسي جاعدايدىڭ ناشارلاۋىنا بايلانىستى اسكەري دوكترينانى وزگەرتۋ ومىرشەڭ دەيدى ساراپشىلار.

Abai.kz