مەملەكەت باسشىسى توتەنشە جاعدايلار ءمينيسترى شىڭعىس ءارىنوۆتى قابىلدادى...

قاسىم-جومارت توقاەۆقا ۆەدومستۆو جۇمىسىنىڭ ناتيجەسى، ازاماتتىق قورعانىس جۇيەسىن جاڭعىرتۋ بارىسى جانە الداعى كەزەڭگە ارنالعان جوسپار جونىندە باياندالدى.

شىڭعىس ءارىنوۆ:

توتەنشە جاعدايلار مينيسترلىگىنىڭ ماتەريالدىق-تەحنيكالىق بازاسىن نىعايتۋ شارالارىن تانىستىردى. سوڭعى ەكى جىلدا بولىمشەلەر 1,4 مىڭنان استام تەحنيكا، اۆياتسيا، زاماناۋي قۇتقارۋ جابدىقتارى، ۇشقىشسىز ۇشۋ اپپاراتتارى جانە بايلانىس قۇرالدارىمەن تولىقتىرىلدى. بۇل ەلىمىزدىڭ بارلىق ءوڭىرىنىڭ توتەنشە جاعدايلار كەزىندە جەدەل ارەكەت ەتۋ مۇمكىندىگىن ايتارلىقتاي ارتتىردى.

سونىمەن قاتار مينيسترلىككە قاراستى بولىمشەلەردى جاڭعىرتۋ جۇمىستارى قولعا الىندى.

بولىمشەلەر جەلىسىن دامىتۋ ماسەلەسىنە توقتالىپ، جاڭا امبەباپ قۇتقارۋ قۇرىلىمدارى، اۆياتسيا جانە تەڭىز جاساقتارى قۇرىلعانى جونىندە ايتتى.

«اۋىل قۇتقارۋشىلارى» باعدارلاماسى اياسىندا 237 ەرىكتى ءورت ءسوندىرۋ بەكەتى سالىنعان. ولار شامامەن 700 ەلدى مەكەننىڭ قاۋىپسىزدىگىن قامتاماسىز ەتەدى. حالىقتى جاپپاي شۇعىل حاباردار ەتۋ جۇيەسىن دامىتۋ جۇمىستارى جالعاسىپ، احۋالدىق ورتالىقتىڭ مۇمكىندىكتەرى كەڭەيتىلىپ جاتىر. سونداي-اق تابيعي ءورتتى ەرتە انىقتاۋ جۇيەلەرى بىرىكتىرىلۋدە.

ۆەدومستۆو قىزمەتكەرلەرىن الەۋمەتتىك قولداۋ شارالارى تۋرالى مالىمەت بەردى. قۇتقارۋشىلارعا تۇرعىن ءۇي تولەمدەرى قاراستىرىلعان. توتەنشە جاعدايلار مينيسترلىگىنىڭ قىزمەتكەرلەرى ءۇشىن ارنايى تۇرعىن ءۇي كلاستەرىن قۇرۋ جوباسى قولعا الىندى. اتالعان باستاما ءورت ءسوندىرۋ بولىمدەرى مەن قۇتقارۋ بازالارىنىڭ جانىندا قاجەتتى ينفراقۇرىلىمى بار تۇرعىن ءۇي كەشەندەرىن سالۋدى كوزدەيدى.

پرەزيدەنت:

مينيسترلىكتىڭ ازاماتتىق قورعاۋ جۇيەسىن جەتىلدىرۋ بويىنشا اتقارىپ جاتقان جۇمىسىن وڭ باعالادى. جەرگىلىكتى اتقارۋشى ورگاندارمەن بىرلەسە وتىرىپ، اۋداندىق جانە اۋىلدىق قۇتقارۋ بولىمشەلەرىنىڭ ماتەريالدىق-تەحنيكالىق بازاسىن نىعايتۋ ءىس-شارالارىن جالعاستىرۋ، زاماناۋي تەحنولوگيالار ەنگىزۋ جانە ءورت قاۋىپسىزدىگى دەڭگەيىن كوتەرۋ جونىندە تاپسىرما بەردى.

Abai.kz