The Washington Post گازەتى اۋعانستانداعى پاندجشەر جازىعى جايىندا كەڭ كولەمدى ماقالا جاريالادى. گازەتتىڭ يسلاماباد جانە كابۋلداعى تىلشىلەرى پاندجشەر قالاسىنا بارعان.

The Washington Post گازەتىنىڭ جازۋىنشا، "تاليبان" باسشىلىعى پاندجشەرداعى سوعىس ارەكەتىن جاسىرۋ ءۇشىن بارىن سالعان. "تاليباننىڭ" رەسمي تۇلعالارى بۇل وڭىردە سوعىس ارەكەتتەرى ءجۇرىپ جاتقان جوق، تۇرعىندارعا زورلىق-زومبىلىق كورسەتىلىپ جاتقان جوق دەپ ايتقان، بىراق مىڭداعان اسكەر وسى ايماققا جۇمىلدىرىلعان", - دەپ جازادى ماقالا اۆتورلارى The Washington Post گازەتىنىڭ يسلامابادتاعى بيۋرو جەتەكشىسى، كابۋلدەگى ءتىلشى سيۋزاننا دجوردج (Susannah George) جانە جۋرناليست ازيز تاسسال (Aziz Tassal).

اتالعان جۋرناليستەر "تاليبان" بيلىگىنەن رۇقسات الىپ، پاندجشەر قالاسىنا بارعان. ولار جەرگىلىكتى تۇرعىندارمەن سويلەسكەن.

"مۇندا نە بولعانىن ەشكىم بىلمەيدى جانە ەشكىمگە مۇندا كەلۋگە رۇقسات بەرىلمەيدى. سىزدەردىڭ پاندجشەرگە قالاي كەلگەنىڭىزگە تاڭ قالامىن", - دەگەن 62 جاستاعى دۇكەن يەسى گۋلزور.

تالىپتەرگە قارسى كۇشتەردىڭ ءبىر قولباسشىسى تىلشىلەرگە قازىر قولىندا جەڭىل قارۋ-جاراق قالعانىن جەتكىزگەن. ولارعا قارۋ-جاراق نەگىزىنەن وزبەك-اۋعان جانە تاجىك-اۋعان شەكاراسى ارقىلى كەلەتىنىن، بىرقاتار ەلدەر قولداۋ كورسەتىپ وتىرعانىن، بىراق كوپ قولداۋعا ءماجبۇر ەكەنىن ايتقان.

جەرگىلىكتى ءوڭىردىڭ اقساقالى قازىر قاقتىعىستار كوبەيە تۇسكەنىن، ەكى جاقتان دا ادامدار ءولىپ جاتقانىن، ءوزى تالىپتەردىڭ بىرنەشە ادامدى ولتىرگەنىن كوزى كورگەنىن قۇپيا تۇردە اڭگىمەلەپ بەرگەن.

ءتالىپ باسشىلىعى The Washington Post گازەتىندە جاريالانعان ماقالاعا بايلانىستى ازىرگە تۇسىنىكتەمە بەرمەگەن.

بۇل ماقالا تالىپتەر مەن اۋعانستاننىڭ ۇلتتىق قارسىلىق مايدانى كۇشتەرى اراسىندا سوعىس كۇشەيگەن كەزدە جاريالاندى. تالىپتەرمەن كۇرەسىپ جاتقان كۇشتەر سوعىستىڭ مامىر ايىندا، رامازان ايى اياقتالعان سوڭ باستالعانىن جەتكىزگەن. بىلتىر تامىز ايىندا "تاليبان" قوزعالىسى كابۋلدى باسىپ العان. قازىر اۋعانستان بيلىگى سولاردىڭ قولىندا.

Abai.kz