كوشدەن وتە الماعان كولىك جۇرگىزۋشىلەرىىڭ ءبىرى تۇرعىندارمەن جانجال كەزىندە تيگەن سوققىدان اۋرۋحانادا قايتىس بولعان.

وقيعانى كورگەندەردىڭ سوزىنە قاراعاندا، كوشەدەن كولىگى وتە الماعان جۇرگىزۋشى جولدى جاۋىپ تۇرعان تۇرعىنداردىڭ ءبىرى – ەگدە كىسىمەن جانجالداسقان. ەگدە كىسىگە كومەكتەسكەن تاعى ءبىر جىگىت يتەرىپ جىبەرگەندە، جۇرگىزۋشى اسفالتقا قۇلاعان. "جەدەل جاردەم" اكەتكەن جۇرگىزۋشى اۋرۋحانادا قايتىس بولعان.

جۇرگىزۋشىنى يتەرگەن ادامدى پوليتسيا اكەتىپ، قاماۋعا العان. پوليتسيا دەپارتامەنتى ءباسپاسوز قىزمەتى وعان قىلمىستىق كودەكستىڭ "دەنساۋلىققا قاساقانا اۋىر زاقىم كەلتىرۋ" بابى بويىنشا ءىس قوزعالعانىن حابارلادى. "رۇقسات ەتىلمەگەن اكتسيا وتكىزدى" دەگەن ايىپپەن تاعى دا ءتورت ادام اكىمشىلىك جاۋاپقا تارتىلعان.

- جۇرگىزۋشىلەردىڭ ءبىرى ەگدە جاستاعى كورشىمىزدى ۇرعانىن كورىپ، كۇيەۋىم ارا ءتۇسىپ، يتەرىپ جىبەرگەن. كورشىمىزگە ازىق-تۇلىك اپارىپ، كومەكتەسەتىنبىز. بۇگىن اۋرۋحاناعا بارعانىمدا جۇرگىزۋشىنىڭ قايتىس بولعانىن ەستىدىم. كۇيەۋىمدى پوليتسيا اكەتتى. ءتورت بالامىز بار، كۇيەۋىم الكوگول ىشىمدىك ىشپەيتىن، تەمەكى شەكپەيتىن ادام. ءبىزدىڭ ءۇيدىڭ تۇرعىندارى بالالارىمىزدىڭ قاۋىپسىزدىگى ءۇشىن كوشەگە شىقتى،- دەيدى قاماۋعا الىنعان ادامنىڭ ايەلى ءمادينا سەيىتاحانوۆا.

قالا تۇرعىندارىنىڭ ماسەلەسىن ءجيى كوتەرەتىن بەلسەندى سالتانات ءتاشىموۆا بۇگىن الەۋمەتتىك جەلىدەگى پاراقشاسىنا 11 ماۋسىمدا بولعان وقيعانىڭ ۆيدەوسىن سالعان. ونىڭ سوزىنشە، كورولەنكو كوشەسىندەگى №8 ءۇي تۇرعىندارىنىڭ ء"وز قۇقىقتارى ءۇشىن كۇرەسىپ جۇرگەنى بيىل عانا ەمەس".

– كورولەنكو كوشەسى – شاعىن، تۇيىق كوشە ء[ۇي پودەزدەرى بىردەن كوشەگە شىعادى– رەد.]. وسىدان بىرنەشە جىل بۇرىن №8 ءۇيدىڭ ىرگەسىنەن "تەررا" تۇرعىن ءۇي كەشەنىنىڭ قۇرىلىسىن باستاعان. "تەررا" تۇرعىن ءۇيى جانىنداعى بەس قاباتتى ءۇيدىڭ اۋلاسىن جاۋىپ، كولىك تۇراعىن دا العان، ءۇي تۇرعىندارىنىڭ ەسىك الدىنا شىعۋى قاۋىپتى بولا باستاعان. ويتكەنى شاعىن كوشەمەن كولىك ۇزىلمەيدى، – دەيدىسالتانات ءتاشىموۆا.

ازاتتىق تىلشىسىمەن سويلەسكەن №8 ءۇي تۇرعىندارى شاعىن كوشەگە شلاگباۋم قويۋ تۋرالى ماسەلەنى اكىمدىككە بىرنەشە رەت ايتقانىن، بىراق اكىمدىك ءتۇرلى ۋادەمەن شىعارىپ سالعانىن حابارلادى. وقيعا بولعان كۇنى اكىمدىك وكىلدەرى كەلىپ، تۇرعىنداردى جيىنعا شاقىرعان. اكىمدىكتىڭ ۋاجىنە تاعى دا نارازى بولعان تۇرعىندار كوشەنى جاۋىپ، كولىك الدىن بوگەگەن.

– تۇرعىنداردىڭ شىدامى تاۋسىلۋعا اينالدى. ءسويتىپ اياق استىنان جولدى جاۋىپ تاستادى. ولاردى مۇنداي قادامعا بيلىك، اكىمدىك جەتكىزدى. بيلىك قۇرىلىس كومپانيالارىنىڭ سويىلىن سوعادى. الماتىدا تۇرعىنداردىڭ كونستيتۋتسيالىق قۇقىعىن بۇزاتىن زاڭسىز قۇرىلىستار وتە كوپ. الەۋمەتتىك احۋال كۇن سايىن ۋشىعىپ بارادى، كەشەگى كىسى ءولىمى سونىڭ كورىنىسى،- دەيدى سالتانات تاشيموۆا

كورولەنكو كوشەسىنىڭ بويىنداعى №8 بەس قاباتتى ءۇي 1990 جىلدارى سالىنعان. پايدالانۋعا بەرىلگەن 17 قابات "تەررا" تۇرعىن ءۇي كەشىنى بەس بلوكتان تۇرادى.

تۇرعىن ءۇيدى سالعان Tau Development كومپانياسى "تەررا" تۇرعىن ءۇي كەشەنىن "جايلى ءومىر مەن قاۋىپسىزدىكتى قادىرلەيتىن ادامدارعا ارنالعان ءۇي" دەپ سيپاتتايدى.

Abai.kz