جالپىعا بىردەي دەكلاراتسيالاۋدىڭ ءبىرىنشى كەزەڭىندە شەتەلدە قازاقستاندىق شەنەۋنىكتەر مەن باسقا دا تۇلعالارعا تيەسىلى 666 جىلجىمايتىن مۇلىك نىسانى انىقتالدى. بۇل تۋرالى مەملەكەتتىك كىرىستەر كوميتەتى مالىمدەدى، دەپ جازدى Ulysmedia.kz

جالپىعا بىردەي دەكلاراتسيالاۋدىڭ ءبىرىنشى كەزەڭىنە مەملەكەتتىك قىزمەتشىلەر، سونداي-اق مەملەكەتتىك فۋنكتسيالاردى ورىنداۋعا ۋاكىلەتتىك بەرىلگەن ادامدار، ولارعا تەڭەستىرىلگەن ادامدار مەن ولاردىڭ جۇبايلارى كىرەدى. بۇدان بولەك،  "سايلاۋ تۋرالى", "سىبايلاس جەمقورلىققا قارسى ءىس-قيمىل تۋرالى", "بانكتەر جانە بانك قىزمەتى تۋرالى", "ساقتاندىرۋ قىزمەتى تۋرالى" جانە "باعالى قاعازدار نارىعى تۋرالى" قر زاڭدارى بويىنشا دەكلاراتسيا تاپسىرۋعا مىندەتتى ادامدارعا دا وسى ساناتتا.

جۇيەگە كىرگەن العاشقى جىلى اكتيۆتەر مەن مىندەتتەمەلەر تۋرالى دەكلاراتسيا تاپسىرىلادى. مەملەكەتتىك كىرىستەر كوميتەتىنىڭ مالىمەتى بويىنشا، مۇنى 497 مىڭ ادام جاساعان. ولاردىڭ 494-ءى 26 شەت مەملەكەتتەگى 666 جىلجىمايتىن مۇلىك نىسانىن كورسەتتى.

نىسانداردىڭ ەڭ كوپ سانى رەسەيدە – 436. سونداي-اق، قازاقستاندىق شەنەۋنىكتەردىڭ ءباا-دە – 44, تۇركيادا – 38, يسپانيادا – 24, انگليا مەن بولگاريادا – 20, وزبەكستاندا – 12, گرۋزيادا – 9, قىرعىزستاندا – 8 جىلجىمايتىن مۇلىك نىسانى بار.

ۋكراينادا قازاقستان ازاماتتارىنا تيەسىلى 6 جىلجىمايتىن مۇلىك. ءازىربايجاندا، قىتايدا جانە چەحيادا – 5. گەرمانيادا، كيپردە، اقش - تا جانە تايلاندتا – 4 نىسان كورسەتىلگەن.

كوميتەت ناقتىلاعانداي، شەتەلدە جىلجىمايتىن مۇلكى مەن اۆتوكولىگى بار قازاقستاندىقتار ولار ءۇشىن ءوز ەلىنىڭ بيۋدجەتىنە سالىق تولەمەيدى.

Abai.kz