وتباسى قايدا تۇرىپ جاتقانى جايىندا ءار دەپۋتات ءوزى جاۋاپ بەرۋى كەرەك. بۇل پىكىردى ءماجىلىس توراعاسى ەرلان قوشانوۆ ايتتى، دەپ حابارلايدى قازاقپارات ءتىلشىسى.

ءماجىلىستىڭ جالپى وتىرىسىنان كەيىن تىلشىلەر ە.قوشانوۆتان بۇرىنعى دەپۋتات جانە قازىرگى عىلىم ءمينيسترى ساياسات نۇربەكتىڭ وتباسى شەتەلدە تۇرىپ جاتقانى قانشالىقتى ەتيكاعا ساي كەلەتىنىن سۇرادى.

«مەنىڭ ويىمشا، كەشە ساياسات نۇربەك ءوزىنىڭ وتباسى نە سەبەپتى شەتەلدە ەكەنىن تۇسىندىرگەن سياقتى. ەكىنشىدەن، ول ءتورت اي بۇرىن عانا دەپۋتات رەتىندە كەلدى. وعان دەيىن س.نۇربەك دەپۋتات بولماعان ەدى. ياعني سالىق تولەۋشىلەر ەسەبىنەن بيۋدجەتتەن جالاقى المادى. سوندىقتان بۇل ونىڭ تاڭداۋى بولدى»، - دەدى ءماجىلىس توراعاسى.

وسى ورايدا ول قانداي دا ءبىر تەكسەرۋ بولمايتىنىن ايتتى.

«ءار دەپۋتات سىزدەردىڭ، حالىقتىڭ الدىندا بالالارى قايدا وقىپ جاتقانى، وتباسى قايدا تۇرىپ جاتقانى جايىندا ءوزى جاۋاپ بەرۋى كەرەك. مەن وزىمە قاتىستى جاۋاپ بەرە الامىن، مەنىڭ بالالارىم قاراپايىم مەكتەپتە ءبىلىم الدى»، - دەدى ە.قوشانوۆ.

سونىمەن قاتار ول ماجىلىستە ەتيكا كوميسسياسى بار ەكەنىن، دەپۋتاتتارعا قاتىستى ماسەلە وندا قارالماعانىن ايتتى. جاقىندا عىلىم جانە جوعارى ءبىلىم ءمينيسترى لاۋازىمىنا تاعايىندالعان ساياسات نۇربەك بالالارىن نەگە شەتەلدە وقىتقانىن ءتۇسىندىردى.

«ونىڭ ءۇش سەبەبى بار، ەڭ الدىمەن جۇبايىمنىڭ دەنساۋلىعىندا كىنارات بار، وعان ناقتى مەديتسينالىق ۇسىنىم دا بار. ەكىنشىدەن، بالالارىمدى قازاقستانداعى جەكە مەكتەپتەردە وقىتۋعا قاراجاتىم جەتپەدى، ۇشىنشىدەن، كيپردە بريتاندىق فورماتتاعى جاقسى اعىلشىن مەكتەبى بولدى. بىراق ۋايىمداماڭىزدار، 26 ماۋسىم كۇنى بالالارىم قازاقستانعا ۇشىپ كەلەدى»، - دەپ جاۋاپ بەردى مينيستر.

Abai.kz