پرەزيدەنت قاسىم-جومارت توقاەۆ ۇلتتىق قۇرىلتايدىڭ قۇرامى مەن ەرەجەسىن ءوز جارلىعىمەن بەكىتتى. بۇل تۋرالى قر مەملەكەتتىك كەڭەسشى ەرلان قارين ءوز تەلەگرام ارناسىندا جازدى. قۇرىلتاي قۇرامى قوعامعا قوزعاۋ سالا بىلەتىن ازاماتتىق قوعام بەلسەندىلەرى مەن ەلتۇتقا ازاماتتاردان قۇرالىپتى. اۋزى دۋالى اقساقال اعا بۋىن مەن ءسوزى الىمدى، پىكىرى شالىمدى ورتا بۋىنىڭ بەلدى وكىلدەرىنىڭ باسى قوسىلاتىنىن بايقادىق. ەڭبەك ەرى ءىليا جاقانوۆ، حالىق جازۋشىسى مۇحتار شاحانوۆ، عارىشكەر توقتار اۋباكىروۆ، ماتەماتيك اسقار جۇمادىلداەۆ، قوعام جانە مەملەكەت قايراتكەرى جاقسىبەك كۇلەكەەۆ، ءاليحان بايمەنوۆ، ساياساتكەرلەر ەرمۇرات باپي، نۇرتاي سابيليانوۆ، داۋلەت تۇرلىحانوۆ، دارحان قىدىرالى سىندى اتاعى اتان تۇيەگە جۇك بولار ەسىمدەردىڭ بولۋى قۇرىلتايدىڭ سالماعىن ارتتىرارى ءسوزسىز.

ورتا بۋىننان بيوتەحنولوگ-عالىم، قازاقستاندىق ۆاكتسينانىڭ ءتۇزۋشىسى كۇنسۇلۋ زاكاريا، ءدىنتانۋشى قايرات جولدىبايۇلى، ءتىل عىلىمىنىڭ بىلگىرى انار فازىلجان، بەلگىلى قوعام بەلسەندىسى، ەكولوگ ازاماتحان ءامىرتاي، جوعارى ءبىلىم سالاسىنىڭ بەلدى وكىلى اكادەميك كارىمبەك قۇراماناليەۆ، راۋان كەنجەحان، قار بارسىنىڭ جوعىن جوقتاعان ارمان قاشقىنبەكوۆ تە وسى قۇرامنان تابىلۋى قوعامداعى ءبىلىم، دەنساۋلىق ساقتاۋ، ءتىل، ءدىن جانە ەكولوگيا سىندى تولعاقتى ماسەلەلەردىڭ كۇن تارتىبىندە تۇرعانىن اڭعارۋ قيىن ەمەس. مەملەكەت بۇل ماسەلەلەرگە ءجىتى ءمان بەرىپ وتىر دەپ تۇيدىك. قۇرىلتاي قۇرامىندا بارلىعى 117 ادام بەكىتىلىپتى.

مەملەكەتتىك كەڭەسشىنىڭ ايتۋىنشا، ۇلتتىق قۇرىلتايدىڭ العاشقى قۇرامىنا ءاربىر ءوڭىردىڭ قوعامدىق كەڭەسىنەن ءبىر وكىلدەن ەنىپتى. ۇلتتىق قۇرىلتايدىڭ ەرەكشەلىگى دە سوندا. مۇنى دا ءجون ەكەن دەدىك. ياعني، ەل اۋقىمىنداعى پىكىرالماسۋ الاڭىندا بارلىق ءوڭىردىڭ ءوز وكىلى بار، گەوگرافيالىق اسپەكت ەسكەرىلگەنى قۋانتادى.

ودان وزگە پارلامەنت دەپۋتاتتارى، ساياسي پارتيالار، بيزنەس، مەديتسينا، ءبىلىم بەرۋ، مادەنيەت، سپورت، ادامداردىڭ قۇقىن قورعاۋ جانە باسقا دا سالالىق قۇرىلىمدارىنىڭ بەلدى وكىلدەرى ۇلتتىق قۇرىلتايدىڭ وسى قۇرامىنان تابىلعان ەكەن. ءوزباسىم ساياساتتانۋشى دەپۋتات ايدوس سارىم،ەرلان سايروۆ، جاناربەك ءاشىمجان، جۇلدىز سۇلەيمەنوۆا، قوعام قايراتكەرى مۇرات ابەنوۆ، فەرمەرلەر قاۋىمداستىعىنىڭ پرەزيدەنتى جيگۋلي دايراباەۆ، ادام قۇقىن قورعاۋشى ايمان وماروۆا، مەديا-مەنەدجەرلەر ءلاززات تانىسباي، بەرىك ءۋالي، قانات ساحاريا، باس رەداكتورلار كلۋبى پرەزيدەنتى بيبىگۇل جەكسەنباي، سەرىك ابىكەنۇلى، جازۋشىلار وداعى توراعاسىنىڭ ورىنباسارى اقبەرەن ەلگەزەك، ونەر قايراتكەرى ازامات ساتىبالدى، جۋرناليست ماقسات تولىقباي، كاسىپكەر سىرىمبەك تاۋ، «قازاق ءتىلى» قوعامىنىڭ ۆيتسە-پرەزيدەنتى ماكسيم روجين، ساياساتتانۋشىلار تالعات قاليەۆ، گۇلميرا ىلەۋوۆا، قازىبەك مايگەلدينوۆ، قوعام بەلسەندىسى ايگۇل ورىنبەك، سامات نۇرتازا، جاستار بەلسەندىسى ولجاس سۇلەيمەن، رەكتورلار كورپۋسىنان قاراعاندىدان نۇرلان دۋلاتبەكوۆ، الماتىدان گۇلميرا قاناي، كوپ بالالى انالاردىڭ كۇيىن كۇيتتەپ جۇرگەن ءلاززات قوجاحمەت، زاڭگەر مارات ءباشىموۆ، مەمباسقارۋ اكادەمياسى اقمولا فيليالى ديرەكتورى بەللا گازديەۆا جانە تاعى باسقا تانىمال ەسىمدەردىڭ قۇرىلتاي قۇرامىنا ەنۋى مەملەكەتتىڭ قوعام مەن بيلىك اراسىندا جان-جاقتى، تولىققاندى ديالوگ ورناتۋدى كوزدەيتىن تالپىنىسىن اڭعاردىق.

دەمەك، سالالىق اسپەكت دە قامتىلىپ وتىر، اركىمنىڭ مۇددەسى ەسكەرىلدى. قۇرىلتاي جۇمىسىنا جاستار كوشباسشىلارى مەن قوعام بەلسەندىلەرى دە تارتىلىپتى. سوندىقتان جاس جاعىنان العاندا اعا بۋىن، ورتا بۋىن جانە جاس بۋىننىڭ ءتۇرلى مۇددەسى ەسكەرىلىپ وتىر.

ەرلان قارين سونداي-اق، بۇل قۇرىلتايدىڭ بۇرىنعى ۇلتتىق كەڭەستەن ەرەكشەلىگىن دە ايتىپتى. ايتۋىنشا، بۇرىنعى ۇلتتىق كەڭەس كوبىنە كۇندەلىكتى كۇيىپ تۇرعان وزەكجاردى ماسەلەلەردى تالقىلاسا، ۇلتتىق قۇرىلتاي ۇلتتى بىرىكتىرەتىن الىسقا باعىتتالعان، كەلەشەكتى كوزدەيتىن ستراتەگيالىق ماڭىزدى ماسەلەلەر بويىنشا تالقىلاۋ وتكىزىپ، ۇسىنىس جينايدى.

ۇلتتىق قۇرىلتايدىڭ اياسىندا ونلاين-پلاتفورما قۇرىلعان ەكەن. بۇدان بىلاي ەلدىڭ كوكەيتەستى ماسەلەسىنە قىزىعۋشىلىق تانىتقان بارلىق ازامات ۇلتتىق قۇرىلتايدىڭ حاتشىلىعىنا ءوز ۇسىنىس، پىكىرىن جىبەرە الادى.

جاڭا قازاقستاننىڭ وسىنداي جاڭاشىل باستامالارىنا ساتتىلىك تىلەدىك. قۇرىلتايدىڭ ءاربىر مۇشەسى راسىندا دا قوعامدا وزىندىك ورنى بار سالماقتى تۇلعالار ەكەنىنە قۋاندىق. بارشاسىنىڭ ەڭبەگى جانا بەرسىن. قۇرام مىقتى. قالعانى ىسىنەن كورىنسىن !

قانات اۋەسباي

Abai.kz