قاسيەتتى ۇلىتاۋ تورىندە ءوتىپ جاتقان ۇلتتىق قۇرىلتايدى پرەزيدەنت قاسىم-جومارت توقاەۆتىڭ «جاڭا قازاقستان» يدەياسىن جۇزەگە اسىرۋ جولىنداعى ماڭىزدى شەشىمدەرىنىڭ تاعى ءبىرى رەتىندە جوعارى باعالاپ قولدايمىن، دەپ پىكىرىن ءبىلدىردى تۇركيالىق قازاق عالىمى ابدىلۋاقاپ قارا.

اسىرەسە ەلىمىزدىڭ باسىنا تونگەن قارا بۇلت قاسىرەتتى قاڭتار وقيعاسىنان كەيىن ۇلتتىڭ بىرلىگى مەن ىنتىماقتاستىعىن نىعايتاتىن ۇلى باسقوسۋ دەپ بىلەمىن. 117 قۇرىلتاي وكىلى ىشىندە شەتەل قازاقتارىنىڭ جاناشىرى، بەلگىلى ديپلومات وتانداستار قورىنىڭ پرەزيدەنتى ابزال ساپاربەكۇلىنىڭ دا بولۋىن قۋانىشپەن قارسى الدىم. سونىمەن قاتار شەتەل قازاقتارى وكىلى رەتىندە ساناۋعا بولاتىن بايان ولگەيدەن كەزىندە اتامەكەنگە ات باسىن بۇرىپ سوندا بيزنيس سالاسىندا ءونىمدى جۇمىس اتقارىپ كەلە جاتقان كاسىپكەر سىرىمبەك تاۋدىڭ دا وسى القالى جيىندا ءسوز سويلەيتىن بولۋى قۇپتارلىق. مۇنى، «جاڭا قازاقستان»دا دياسپورا قازاقتارىنىڭ دا ماسەلەلەرىنە بەيجاي قارالمايتىندىعىنىڭ ايقىن بەلگىسى دەپ بىلەمىن، - دەپ جازدى ول.

ول ۇلتتىق تاريحىمىز بەن انا تىلىمىزگە كوبىرەك ءمان بەرىلەتىنى قۋانتارلىق جايت ەكەنىن ايتتى.

عىلىم سالاسىندا دا بەلگىلى ازاماتتاردىڭ بارلىعى قۋانتارلىق. اتاپ ايتقاندا الاش تانۋشى، شەتەلدەرگە بەك تانىمال عالىم پروفەسسور ديقان قامزابەكۇلى، قازاق ءتىلىنىڭ كوسەگەسىن كوگەرتۋ جولىندا تىنباي ەڭبەك ەتىپ كەلە جاتقان پروفەسسور انار فازىلجانوۆا سىندى عالىمدار. بۇل، «جاڭا قازاقستان»دا ۇلتتىق تاريحىمىز بەن انا تىلىمىزگە كوبىرەك ءمان بەرىلەتىندىگىن بەلگىسى بولىپ تابىلادى، - دەدى ول.

ۇلىتاۋداعى ۇلتتىق قۇرىلتايدىڭ تەك اتامەكەن ءۇشىن قانا ەمەس، شەتەل قازاقتارى ءۇشىن دە جاڭا ءبىر بەلەس بولادى دەگەن ۇمىتتەمىن دەدى ول.

ويتكەنى 1991 جىلى ەلىمىز تاۋەلسىزدىگىن الەمگە پاش ەتكەننەن كەيىنگى العاشقى قادامداردىڭ ءبىرى 1992 جىلى الماتىدا «دۇنيەجۇزى قازاقتارى قۇرىلتايىن» شاقىرۋ بولعان ەدى. سوندىقتان دا قاسىرەتتى قاڭتار وقيعاسىنان كەيىن پرەزيدەنت قاسىم-جومارت توقاەۆتىڭ «جاڭا قازاقستان» يدەياسىن جۇزەگە اسىرۋ جولىندا «ۇلتتىق قۇرىلتايدى» شاقىرۋى ورىندى، - دەدى ابدىلۋاقاپ قارا.

ول  ۇلتتىق قۇرىلتاي جۇمىسىنا تابىس تىلەدى.

مەنىڭ وسى قۇرىلتايعا ايتار پىكىرىم، «ۇلتتىق قۇرىلتايدى» «دۇنيەجۇزى قازاقتارى قۇرىلتايى» مەن بىرىكتىرىپ كەلەشەكتە شەتەل قازاقتارىنان دا وكىلدەر تاعايىنداپ «ۇلىستىڭ ۇلى قۇرىلتايى» رەتىندە جۇيەلى تۇردە ونى وتكىزىپ تۇرۋ. ۇلتتىق قۇرىلتاي جۇمىسىنا قاتىسۋشىلاردى قۇتتىقتاي وتىرىپ تابىس تىلەيمىن، - دەپ جازدى ول.

Abai.kz