ەلباسى تۋرالى جەكە زاڭ الىپ تاستالاتىن بولدى
ەلباسى تۋرالى جەكە زاڭدى الىپ تاستايتىن نورما بيىلدان قالماي پارلامەنت قاراۋىنا ۇسىنىلادى. بۇل تۋرالى ادىلەت ءمينيسترى قانات مۋسين مالىمدەدى.
«كونستيتۋتسيادان تۇڭعىش پرەزيدەنت تۋرالى جەكە زاڭ بولۋى كەرەك دەگەن نورما الىنىپ تاستالعاندىقتان، تيىسىنشە بۇل زاڭ دا الىنىپ تاستالۋى ءتيىس. بۇل ەندى قابىلدانعان كونستيتۋتسياداعى وزگەرىستەرگە سايكەس كەيبىر زاڭنامالىق اكتىلەرگە وزگەرتۋلەر مەن تولىقتىرۋلار ەنگىزۋ تۋرالى زاڭ جوباسى اياسىندا جۇزەگە اسىرىلادى. ول بيىل پارلامەنتتىڭ قاراۋىنا ۇسىنىلادى»، - دەدى قانات مۋسين.
سونداي-اق ادىلەت ءمينيسترىنىڭ ايتۋىنشا، قىلمىستىق كودەكستە پرەزيدەنتتىڭ ار-نامىسى مەن قادىر-قاسيەتىنە قولسۇعۋشىلىق ءۇشىن جاۋاپكەرشىلىك قاراستىراتىن جالپى باپ قانا قالادى.
«ول بارلىق پرەزيدەنتكە قاتىستى ورتاق زاڭ. ەلباسى ءۇشىن بولەك باپ بولمايدى»، - دەدى ول.
Abai.kz
