"تەرگەۋشى قىلمىستىق ءىس اياسىندا جۇرگىزىپ جاتقان تەرگەۋ امالدارىنا جومارت ەرتاەۆتى قاتىستىرىپ وتىر. ەرتاەۆقا "قورعانۋعا حاقى بار كۋا" ستاتۋسى بەرىلگەن، وعان قانداي دا ءبىر ايىپ تاعىلماعان" دەگەن الماتى پروكۋراتۋراسى ءباسپاسوز قىزمەتى اگەنتتىككە.
پروكۋراتۋرا RBK بانكى وكىلدەرىنەن قۇقىق قورعاۋ ورگاندارىنا تۇسكەن ارىز بويىنشا قىلمىستىق كودەكستىڭ 189-بابى ("سەنiپ تاپسىرىلعان بوتەن مۇلiكتi يەمدەنiپ الۋ نەمەسە تالان-تاراجعا سالۋ") بويىنشا تەرگەۋ ءجۇرىپ جاتقانىن ايتقان.
RBK بانكىنەن 143 ملرد تەڭگەدەن استام قارجى جىمقىرۋ ءىسى بويىنشا 2020 جىلى قاراشادا ۇكىم شىعارعان سوت بۇرىنعى بانكير جومارت ەرتاەۆتى 11 جىلعا بوستاندىعىنان ايىرىپ، ەكس-بانكيردەن RBK بانك ەسەبىنە 59 ملرد تەڭگە (138 ملن دوللار) تاركىلەدى. قولما-قول اقشامەن قوسا ەرتاەۆقا تيەسىلى اكتسيالار، ۇشاق، ماسكەۋدەگى پاتەر، اكىمشىلىك عيماراتتارى جانە قىمبات كولىكتەر بانكتىڭ يەلىگىنە وتكەن. بۇدان بولەك ەرتاەۆ بانككە 1,1 ملرد تەڭگە قولما-قول اقشا جانە الماتى، نۇر-سۇلتان، شىمكەنت قالالارىنداعى پاتەرلەرىن، كولىكتەرى مەن باسقا دا مۇلكىن تاپسىرعانى ايتىلعان.
2021 جىلى ناۋرىزدا الماتىنىڭ المالى اۋداندىق سوتى "RBK, ەۋرازيا جانە Qazaq بانكتەرىندەگى قارجى جىمقىرۋ ءىسى" بويىنشا ايىپتالعان بۇرىنعى بانكير جومارت ەرتاەۆ پەن وليگارح نۇرلان تىلەۋباەۆقا ۇكىم شىعاردى. سوت بوتەننىڭ سەنىمىنە كىرىپ، الداۋ ارقىلى ونىڭ مۇلكىن يەمدەندى دەپ ايىپتالعان ەرتاەۆتى - 9 جىلعا، "قارجى جىمقىردى" جانە "جالعان قۇجات جاسادى" دەپ ايىپتالعان تىلەۋباەۆقا دا ءدال سونداي مەرزىمدە تۇرمە جازاسىن بەرگەن. ەكەۋىنە 10 جىلعا دەيىن كوممەرتسيالىق ۇيىمداردى باسقارۋ ىسىمەن اينالىسۋعا تىيىم سالعان.
ەرتاەۆ جانە ونىمەن سىبايلاس دەپ تانىلعان تاعى ءتورت ادامنان RBK بانككە - 97,5 ملرد تەڭگە، Qazaq Bank-كە - 46,2 ملرد تەڭگە جانە ەۋرازيا بانكىنە - 24,2 ملرد تەڭگە ءوندىرىپ الۋ تۋرالى بەرىلگەن ءوتىنىشتى سوت قاناعاتتاندىرعان.
2021 جىلى مامىردا اپەللياتسيا سوتى ەرتاەۆتىڭ جازا مەرزىمىن ەكى جىلعا قىسقارتقان. ونىمەن بىرگە 8 جىلعا سوتتالعان Qazaq Bank-ءتىڭ بۇرىنعى اكتسيونەرى باقىت يبراگيمنىڭ (بۇرىنعى پرەمەر-مينيستر، الماتى قالاسىنىڭ بۇرىنعى اكىمى باقىتجان ساعىنتاەۆتىڭ كۇيەۋ بالاسى دەپ ايتىلادى) دە جازاسى ءبىر جىلعا قىسقارعان.
جومارت ەرتاەۆ قازاقستان بيلىگىنىڭ سۇراۋى بويىنشا 2018 جىلى مامىردا ماسكەۋدە ۇستالعان. كەلەسى جىلى ناۋرىزدا رەسەي ونى قازاقستانعا ەكستراديتسيالاعان.
Abai.kz
