16 ماۋسىمدا №2 جىلۋ ەلەكتر ورتالىعىنداعى قازاندىقتاردىڭ بىرىندە جۇمىس ىستەپ جاتقان 35 جاستاعى ازامات بىرنەشە مەتر بيىكتەن قۇلاپ مەرت بولعان.

وقىس وقيعا جايلى ازاتتىققا بەيسەنبى كۇنى تاڭەرتەڭ وسى كاسىپورىننىڭ جۇمىسشىلارى حابارلادى. وندىرىستە ادام قازا بولعانى تۋرالى اقپارات الەۋمەتتىك جەلىلەردە دە تارادى. بىراق ول ساتتە رەسمي ورىندار دا، "ارسەلورميتتال تەمىرتاۋ" (امت) كومپانياسى دا ول تۋرالى ەشتەڭە ايتپادى.

ءمان-جايدى انىقتاۋ ءۇشىن حابارلاسقان ازاتتىق تىلشىسىنە قاراعاندى وبلىسى اكىمدىگىنىڭ ءباسپاسوز قىزمەتى تاڭەرتەڭ بولعان وقيعا جونىندە اقپارات دايىنداپ جاتقانىن ايتتى. بيلىك وكىلدەرى قازا تاپقان ازامات امت كومبيناتىنىڭ مەردىگەر ۇيىمىندا جۇمىس ىستەگەن دەپ ناقتىلادى.

كەيىنىرەك مەردىگەر كومپانيا – "AB Construction" جاۋاپكەرشىلىگى شەكتەۋلى سەرىكتەستىگى باسشىلىعى جۇمىسشىسىنىڭ "وقىس وقيعادان قاتتى جاراقات الىپ، كوز جۇمعانىن", وقيعانىڭ جاي-جاپسارى تەكسەرىلىپ جاتقانىن حابارلادى.

كەيىنگى ءبىر اپتادا "ارسەلورميتتال تەمىرتاۋ" (امت) كومپانياسىنىڭ مەتاللۋرگيا كومبيناتىندا وسىمەن بەسىنشى ادام قازاعا ۇشىراپ وتىر. 10 ماۋسىمدا ءتورت جۇمىسشى مەرت بولىپ، قاتتى زارداپ شەككەن تاعى ءبىر ادام اۋىر حالدە اۋرۋحاناعا تۇسكەن. ول جولى پەشتىڭ توبەسى وپىرىلىپ، ادامدار ءۇيىندىاستىندا قالعان.

Abai.kz