ۇلتتىق قاۋىپسىزدىك كوميتەتى قازاق-قىتاي شەكاراسى بەكەتتەرىندە بيلىكتى اسىرا پايدالانۋ فاكتىلەرى بويىنشا جۇرگىزىلىپ جاتقان تەرگەۋ بارىسىندا ۇقق توراعاسىنىڭ ەكس-ورىنباسارى، شەكارا قىزمەتىنىڭ ديرەكتورى بولعان گەنەرال-لەيتەنانت دارحان ءدىلمانوۆتىڭ ۇستالعانىن حابارلادى.

بۇعان قوسا، شەكارا قىزمەتىنىڭ الماتى وبلىسى بويىنشا دەپارتامەنتى "نۇر جولى" شەكارا باقىلاۋ ءبولىمىنىڭ باستىعى مايور نۇرمان ارىسباەۆ جانە تاعى بىرنەشە ادام دا ۇستالعان. كۇدىككە ىلىنگەندەردىڭ ءبارى ۋاقىتشا تەرگەۋ يزولياتورىنا قامالدى.

ۇقك "تەرگەۋ مۇددەسىنە بايلانىستى باسقا اقپاراتتار جاريالانبايتىنىن" ايتتى. ءدىلمانوۆ بيىل ساۋىردە ۇقك توراعاسىنىڭ ورىنباسارى - شەكارا قىزمەتىنىڭ ديرەكتورى قىزمەتىنەن بوساتىلعان ەدى. ول 1998 جىلدان بەرى ۇقك شەكارا قىزمەتىنە جۇمىس ىستەپ، 2015 جىلى ماۋسىمدا شەكارا قىزمەتىنە ديرەكتور بولىپ تاعايىندالعان.

قازاقستان پرەزيدەنتى قاسىم-جومارت توقاەۆ قاڭتار وقيعاسىنان كەيىن قازاق-قىتاي شەكاراسىنداعى كەدەن بەكەتتەرىندە كونتراباندا مەن جەمقورلىق ماسەلەسىنە نازار اۋدارىپ، ونى جويۋدى تاپسىردى. وسىدان سوڭ ەلدە قىتايمەن شەكاراداعى كەدەندەرگە قاتىستى تەكسەرىس باستالعان.

Abai.kz