قازاقستان پرەزيدەنتى قاسىم-جومارت توقاەۆ 23 ماۋسىمدا قىرعىزستاننىڭ بۇرىنعى پرەزيدەنتى اسقار اقاەۆتى قابىلدادى. بۇل تۋرالى ازاتتىقتىڭ قىرعىز قىزمەتىنە قوعام قايراتكەرى بەكبولوت تالعاربەكوۆ حابارلادى.

ونىڭ ايتۋىنشا، ءۇش كۇن الماتىدا بولعان اسقار اقاەۆ قازاقستان استاناسىنا ۇشىپ، سول جەردە توقاەۆپەن كەزدەسكەن. قازاقستان پرەزيدەنتىنىڭ ءباسپاسوز قىزمەتى بۇل جۇزدەسۋ تۋرالى رەسمي اقپارات تاراتپادى، الايدا قازاقستاندىق باق توقاەۆتىڭ اقاەۆپەن، ونىڭ ايەلى مايرا اقاەۆامەن بىرگە تۇسكەن سۋرەتىن جاريالادى.

19 ماۋسىمدا اسقار اقاەۆ الماتىدا ءال-فارابي اتىنداعى قازاق ۇلتتىق ۋنيۆەرسيتەتىندە ءدارىس وقىدى.

اقاەۆ 1991-2005 جىلدار ارالىعىندا قىرعىزستان پرەزيدەنتى قىزمەتىن اتقاردى. 2005 جىلعى 24 ناۋرىزدا "قىزعالداق رەۆوليۋتسياسى" كەزىندە ول قىزمەتتەن كەتىپ، كەيىن ماسكەۋدەن ساياسي باسپانا الدى.

2021 جىلى اسقار اقاەۆ قىرعىزستانعا ەكى مارتە كەلىپ، ۇلتتىق قاۋىپسىزدىك جونىندەگى مەملەكەتتىك كوميتەت ساۋالدارىنا جاۋاپ بەردى.

Abai.kz