رەسەي قورعانىس ءمينيسترى سەرگەي شويگۋ پرەزيدەنت ۆلاديمير پۋتينگە ءوزىن تاۋەلسىز دەپ جاريالاعان "لۋگانسك حالىق رەسپۋبليكاسىن ازات ەتكەنى" تۋرالى ەسەپ بەردى. ۋكراين جاعى ازىرگە رەسەي ءمينيسترىنىڭ مالىمەتىنە جاۋاپ بەرگەن جوق.

شويگۋ پۋتينگە رەسەي اسكەرى ليسيچانسك قالاسىنا تولىقتاي باقىلاۋ ورناتقانىن دا جەتكىزدى.

ۋكراين ارمياسى لۋگانسك وبلىسىنداعى ليسيچانسك قالاسىنداعى بەكىنىسىنەن شەگىنگەن. بۇل تۋرالى ۋكراينا قارۋلى كۇشتەرىنىڭ باس شتابى حابارلادى.

باس شتاب مالىمەتىنشە، شەگىنۋ تۋرالى شەشىم "باسقىنشى اسكەردىڭ ارتيللەرياسى، اۆياتسياسى، توپەلەپ وق اتۋ رەاكتيۆتى جۇيەسى، قارۋ-جاراعى مەن جاۋىنگەر سانى كوپ بولۋىنا بايلانىستى" قابىلدانعان. قالا قورعانىسىن ۇستاپ تۇرۋدىڭ سالدارى اۋىر بولار ەدى، دەپ ەسەپتەيدى ۋكراين باس شتابى. ء"بىز قايتا ورالىپ، مىندەتتى تۇردە جەڭىسكە جەتەمىز", – دەلىنگەن حابارلامادا.

ليسيچانسك لۋگانسك وبلىسىندا ۋكراين جاۋىنگەرلەرىنىڭ باقىلاۋىنداعى جالعىز قالا ەدى.

ليسيچانسك قالاسى ءۇشىن كەسكىلەسكەن ۇرىس بىرنەشە كۇنگە سوزىلدى. 3 شىلدەدە تاڭەرتەڭ لۋگانسك اسكەري-ازاماتتىق اكىمشىلىگىنىڭ باسشىسى سەرگەي گايداي رەسەيلىك كۇشتەر باسىپ العان جەرلەرگە بەكىنىپ جاتقانىن حابارلاعان.

Abai.kz