الماتى قالاسى المالى اۋدانىندا ورتا مەكتەپ پەن مەكتەپكە دەيىنگى ءبىلىم بەرۋ سالاسىنا ارنالعان عيماراتتاردىڭ تاپشىلىعى بايقالادى. اۋداندا بالالارعا 4,1 مىڭ ورىن جەتىسپەيدى. الماتى اكىمى ەربولات دوساەۆ بۇل باعىتتا جۇمىستار جۇرگىزىلىپ جاتقانىن ايتتى.

"ماسەلەن، بيىل (№34 جانە 144 گيمنازيالارعا) 850 ورىندىق 2 قوسىمشا قۇرىلىس پايدالانۋعا بەرىلدى. №15 گيمنازيانى سەيسميكالىق كۇشەيتۋ ارقىلى كۇردەلى جوندەۋ جۇمىستارى باستالدى (2023 جىلدىڭ شىلدە ايىندا اياقتالادى). وقۋشىلار ءۇيىنىڭ عيماراتىن بۇزىپ، №16 مەكتەپكە قوسىمشا قۇرىلىس سالۋ ءۇشىن جوبالاۋ قۇجاتتاماسىن ازىرلەۋ باستالادى (ساراپتاما قورىتىندىسىن الۋ مەرزىمى – 2023 جىلدىڭ 3-ءشى توقسانى)", - دەدى ەربولات دوساەۆ.

سونىمەن قاتار قالا اكىمى مەكتەپكە دەيىنگى ءبىلىم بەرۋ وبەكتىلەرى بويىنشا №43 بالاباقشا عيماراتىنىڭ بۇرىن جەكەشەلەندىرىلگەن بولىگى ساتىپ الىنعانىن ايتتى.

"وقۋ جىلىنىڭ باسىنا دەيىن №7 بالاباقشانى سەيسميكالىق كۇشەيتۋدى اياقتايمىز. مۇراتباەۆ - جىبەك جولى كوشەسىندەگى بۇرىنعى بالاباقشا عيماراتىن جەكە مەنشىكتەن قايتارىپ الۋ جانە تىلەنديەۆ كوشەسىندەگى بۇرىنعى بالاباقشانى قالپىنا كەلتىرۋ ماسەلەسىن پىسىقتاپ جاتىرمىز", - دەدى ول.

Abai.kz