«الماتىنى دامىتۋ ورتالىعىنىڭ» سايتىندا الماتى اكىمدىگى دايارلاعان «الماتى – ادامدار ءۇشىن جاھاندىق قالا» باعدارلاماسى جاريالاندى. باعدارلاما 2022 جىلدىڭ 1 شىلدەسىنە دەيىن قالا تۇرعىندارىنىڭ تالقىسىنا تۇسەدى.

قازاقستاننىڭ ەڭبەك ەرى، ۇستاز اياگۇل ميرازوۆا  وسى باعدارلاما ىسكە اسسا، ءبىراز دۇنيە ءوز ورنىنا كەلەتىنىن ايتتى.

«قالا اكىمدىگى وتە  ۇلكەن،  اۋقىمدى، جان-جاقتى قامتىلعان «الماتى – ادامدار ءۇشىن جاھاندىق قالا»  اتتى 2025 جىلعا دەيىنگى دامۋ جوسپارىنىڭ نەگىزگى باسىمدىقتارى جانە 2030 جىلعا دەيىنگى ورتا مەرزىمدى پەرسپەكتيۆالارى كورسەتىلگەن جوبانى ۇسىنىپ وتىر. تەرەڭ ويلاناتىن بولساق، نۇر ۇستىنە نۇر بولار ەدى. ارينە، ول ءۇشىن ءبىراز جۇمىس اتقارىلۋ كەرەك. وسىنداي جوبانىڭ ىسكە اسۋىنا قالا تۇرعىندارى  قۋانىپ اتسالىسادى دەپ ويلايمىن»، – دەدى اياگۇل ميرازوۆا.

ونىڭ ايتۋىنشا، قالا اكىمىنىڭ ءبىلىم بەرۋ سالاسىنا ەرەكشە نازار اۋدارىپ وتىرعانىن جەتكىزدى.

«ساپالى ءبىلىم الۋ ءۇشىن، مەكتەپتىڭ ماتەريالدىق، تەحنيكالىق جاعدايى، ساپالى ۇستازداردىڭ ساپالىق قۇرامى ءاربىر سىنىپتا وتىرعان وقۋشىلاردىڭ سانىنا بايلانىستى. مەكتەپتەگى احۋالعا بايلانىستى ادامدار بالالارىن جاقسى مەكتەپكە بەرگىسى كەلەدى. سول مەكتەپتىڭ باسشىسىنىڭ ىسكەرلىگىنە، ۇستازدارىنا تىكەلەي بايلانىستى دەپ ويلايمىن. سوندىقتان دا قولجەتىمدى ساپالى مەكتەپ بولۋ ءۇشىن، وسى جاعىنا دا قاتتى كوڭىل ءبولۋ كەرەك. ال وسى باعدارلاماداعى 2025 جىلعا دەيىن سىنىپتاعى وقۋشى سانى 25-تەن اسپاۋى كەرەك دەگەندى  قۋانا-قۋانا قابىلدايمىز. بۇل – وتە دۇرىس. وسى باعدارلاما ىسكە اسسا، ءبىراز دۇنيە ءوز ورنىنا كەلەدى»، – دەدى ول.

ايتا كەتەيىك، الماتى اكىمدىگى «الماتى – ادامدار ءۇشىن جاھاندىق قالا» باعدارلاماسىن ازىرلەدى. جوبا جەتى بولىمنەن تۇرادى، ولار: «جايلى قالالىق ورتا»، «تۇراقتى ەكونوميكالىق ءوسۋ»، «باسقارىلاتىن ۋربانيزاتسيا»، «الەۋمەتتىك ورنىقتىلىق پەن تۇراقتىلىق»، «جاسىل الماتى»، «سمارت سيتي»، «قاۋىپسىز قالا».

الماتىنى كەڭىستىكتىك دامىتۋدىڭ نەگىزگى مىندەتى – جايلى قالالىق ورتا قۇرۋ جانە قالانىڭ بارلىق اۋداندارىندا ءومىر ءسۇرۋ ساپاسىن ارتتىرۋ. ول ءۇشىن ءۇش باسىم باستاما ايقىندالدى: الماتىنى كوپورتالىقتى دامىتۋ، قوعامدىق كولىكتىڭ دامىعان جۇيەسى جانە اۋدانداردىڭ بايلانىستىلىعى، جاڭا تاريفتىك ساياساتتى ەنگىزۋ جانە شىعىنداردى ازايتۋ ارقىلى تكش قىزمەتتەرىنىڭ ساپاسىن جاقسارتۋ.

Abai.kz