ەكونوميست ماقسات حالىق وليگارحتاردان مەملەكەتكە قايتارىلعان قاراجاتتى حالىققا بەرسە بولادى دەپ ەسەپتەيدى. بۇل تۋرالى ول arasha-عا بەرگەن پىكىرىندە ايتتى.

«وسى قاراجاتتاردان ارنايى قور قۇرىپ، تىكەلەي الەۋمەتتىك وسال توپتارعا قولداۋ جاساۋعا بولادى. ماسەلەن، الەۋمەتتىك كارتا تۋرالى باستامالار ايتىلادى باستادى. كۇنى كەشە دەپۋتاتتار دا الەۋمەتتىك كارتالاردى جانداندىرايىق دەدى. مىنەكەي، قاراجاتتى تىكەلەي سول الەۋمەتتىك كارتاعا اۋدارۋعا بولادى. مىسالى، كوپ بالالى وتباسى تامىزدا بالالارىن مەكتەپكە دايىنداۋى كەرەك بولسا، سول ساتتە الەۋمەتتىك كارتاعا ايتالىق، 100 مىڭ تەڭگە تۇسە قالسا، ول كوپبالالى وتباسى ءۇشىن جاقسى كومەك بولادى»، – دەدى ماقسات حالىق.

ونىڭ ايتۋىنشا، وليگارحتاردان تۇسكەن قاراجات بيۋدجەت دەفيتسيتىن جابۋعا جىبەرىلۋى دە مۇمكىن. بىراق ول قاراجاتتىڭ بيۋدجەتتەن الەۋمەتتىك ماسەلەلەردى شەشۋگە تىكەلەي جۇمسالاتىنىنا جانە ناقتى ءزارۋ ادامداردىڭ قولىنا جەتەتىنىنە تاعى دا كۇمان بار.

ەكونوميستتىڭ پىكىرىنشە، وليگارحتاردان قايتارىلعان قاراجاتتى ۇلتتىق قورعا اۋدارۋعا دا بولادى. قازىرگى كەزدە ۇكىمەت ۇلتتىق قوردىڭ قارجىسىن پايدالانۋ ليميتىنە جەتىپ تۇر. ۇلتتىق قورداعى اقشا جىل سايىن ازايىپ كەلەدى.

بۇعان دەيىن باس پروكۋراتۋرادا ەكونوميكالىق رەسۋرستاردىڭ زاڭسىز شوعىرلانۋىنا قارسى ءىس-قيمىل ماسەلەلەرى جونىندەگى كوميسسيا كەزەكتى وتىرىسى ءوتىپ، وندا قايرات بورانباەۆ – 11,3 ملرد تەڭگە، قايرات ساتىبالدىۇلى – 36 ملرد، گۇلميرا ساتىبالدى – 230 ملرد، ۇلتتىق قاۋىپسىزدىك كوميتەتىنىڭ بۇرىنعى باسشىلارى مەن قىزمەتكەرلەرىنىڭ ءباا دەگى 3 ملن اقش دوللارى كولەمىندەگى قاراجاتتار مەملەكەتكە قايتارىلعانى جاريا بولعان ەدى.

Abai.kz