الماتى قالاسىنىڭ اكىمى ەربولات دوساەۆ ناۋرىزباي، جەتىسۋ، مەدەۋ اۋداندارىنداعى جۇمىس ساپارى بارىسىندا جول ينفراقۇرىلىمى نىساندارىنا ارنايى باردى.

قالانى ارالاۋعا شىققان اكىم ەڭ الدىمەن ناۋرىزباي اۋدانىنداعى تاستىبۇلاق شاعىن اۋدانىنداعى جولداردىڭ ورتاشا جوندەۋ جۇمىستارىمەن تانىستى، وندا ۇزىندىعى 8,6 شاقىرىمدى قۇرايتىن 6 كوشەدە جوندەۋ جۇمىستارى ءجۇرىپ جاتىر. بۇگىندە تاۋتاعان كوشەسى جوندەۋدەن ءوتتى. قالعان كوشەلەر ينجەنەرلىك كوممۋنيكاتسيالاردىڭ قۇرىلىسى تولىق اياقتالعاننان كەيىن جوندەلەدى. وسى تۇستا اكىم تۋىنداعان سۇراقتارعا بايلانىستى ءتيىستى باسقارمالاردىڭ جاۋابىن الدى. بۇگىنگى كۇنى ينجەنەرلىك كوممۋنيكاتسيالار قۇرىلىسىن جۇرگىزەتىن مەردىگەر كومپانپيا كەلىسىم-شارت بويىنشا مىندەتتەمەلەرىن دۇرىس ورىنداماعاندىقتان، شاعىن اۋداندا جول جوندەۋ جۇمىستارى توقتاپ قالعان. الماتى قالاسى بويىنشا ەكولنوميكالىق تەرگەۋ دەپارتامەنتى قازىر بۇل ىسكە قاتىستى تەرگەۋ جۇرگىزۋدە. شاھار باسشىسى جوسپارلانعان جۇمىستى ۋاقىتىلى ءارى ساپالى اياقتاۋ ءۇشىن جۇمىستى جالعاستىرۋدىڭ قوسىمشا جوسپارىن قاراستىرۋعا تاپسىرما بەردى.

سونداي-اق قالا باسشىسى اقجار شاعىن اۋدانىنداعى جول قۇرىلىسى ءجۇرىپ جاتقان ايماققا باردى. مۇندا جالپى ۇزىندىعى 45,3 شاقىرىمدى قۇرايتىن 89 كوشەگە جاڭا جولدار سالىنۋدا. بۇگىنگى تاڭدا 2,5 شاقىرىمدى قۇرايتىن 10 كوشەگە اسفالت-بەتون توسەلدى. جول جوندەۋ جۇمىستارىن 2023 جىلدىڭ سوڭىنا دەيىن اياقتاۋ جوسپارلانىپ وتىر.  اكىم اسفالت توسەۋ جۇمىستارىنىڭ ساپاسىنا قاتىستى ەسكەرتۋلەر بەرىپ، اتقارىلىپ جاتقان جۇمىستاردىڭ ساپاسىنا باقىلاۋدى كۇشەيتۋدى تاپسىردى.

قالانى ارالاۋ كەزىندە الماتى اكىمى تولە بي كوشەسىن قالا شەكاراسىنا دەيىن ۇزارتۋعا ارنالعان جول قۇرىلىس جۇمىستارىنىڭ بارىسىن تەكسەردى. وسىعان وراي ماماندار جۇمىسقا دايىندىق جۇرگىزىپ، جۇمىسشىلاردى جۇمىلدىرۋ شارالارىمەن اينالىسۋدا، بۇل جۇمىس 2023 جىلدىڭ سوڭىنا دەيىن اياقتالادى دەپ جوسپارلانىپ وتىر. ەربولات دوساەۆ قالا تۇرعىندارىنان ءتۇسىپ جاتقان وتىنىشتەردى ەسكەرە وتىرىپ، وسى باعىتتاعى جۇمىستاردى كۇشەيتىپ، جىل سوڭىنا دەيىن «الما سيتي» تۇرعىن ءۇي كەشەنىنە قاتىناۋدى قامتاماسىز ەتۋ ءۇشىن تولە بي كوشەسىن ءجۇنىسوۆ كوشەسىنە دەيىن ۇزارتۋدى تاپسىردى.

جۇمىس ساپارىنىڭ كەلەسى نىسانى – جەتىسۋ اۋدانىنداعى سەيفۋللين داڭعىلى مەن جانسۇگىروۆ كوشەلىرىنىڭ قيىلىسىنداعى كولىك اينالما جولى. بۇل نىساننىڭ قۇرىلىسى ۇزاققا سوزىلىپ كەتتى، مەردىگەر جۇمىستى ساپاسىز اتقارۋدا جانە وندىرىستىك پروتسەسستىڭ جۇمىس كەستەسى دە بۇزىلعان.  وسىعان بايلانىستى اكىم ءبىر اپتا ىشىندە مەردىگەرگە شارا قولدانۋدى تاپسىردى. بۇل جول ايىرىعىن ۋاقىتىندا پايدالانۋعا بەرۋ سولتۇستىك باعىتتاعى وتكىزۋ قابىلەتتىلىگىن ارتتىرىپ، سەيفۋللين داڭعىلىنىڭ بويىنداعى كولىك قوزعالىسىن 15-20 پايىزعا، جانسۇگىروۆ كوشەسىنىڭ بويىنداعى قوزعالىستى 10-15 پايىزعا ارتتىرۋى ءتيىس ەدى.

سونداي-اق اكىم مەدەۋ اۋدانىندا جولدارداعى ويىقتار مەن جارىقشاقتاردىڭ پايدا بولۋىنىڭ الدىن الۋ ءۇشىن پوليمەرلى بيتۋم نەگىزىندەگى اسفالت-بەتون قوسپاسىن تاجىريبە جۇزىندە قولدانۋ بارىسىمەن تانىستى. 2022 جىلدىڭ 16-17 شىلدەسىندە گوگول كوشەسىنىڭ ءۇش ۋچاسكەسىندەگى اۆتوبۋس جولىنىڭ سولتۇستىك جاعىندا وسى جول-قۇرىلىس ماتەريالىن تاجىريبەلىك پايدالانۋ بويىنشا جۇمىستار جۇرگىزىلگەن بولاتىن. ماماندار بۇل تەحنولوگيانىڭ تيىمدىلىگى مەن جابىننىڭ جاي-كۇيىن جىل بويى باقىلاپ وتىراتىن بولادى.

قالانى ارالاۋ قورىتىندىسى بويىنشا الماتى اكىمى ورىندالعان جۇمىستاردىڭ ساپاسىنا باقىلاۋدى كۇشەيتىپ، جوبالاردى مەرزىمىندە اياقتاۋدى تاپسىردى.