قازاقستان اسكەرىندە الىمجەتتىك ماسەلەسى قالاي بولىپ جاتىر؟ اسكەردەگى قۇقىقبۇزۋشىلىقتى بولدىرماۋ ماقساتىندا قانداي شارالار ىسكە اسىرىلۋدا؟ بۇل سۇراقتارعا قر قورعانىس مينيسترلىگى قازاقپارات ءتىلشىسى جولداعان ساۋالدا جاۋاپ بەردى.

«قر كونستيتۋتسياسىنىڭ 36-بابىندا «قازاقستان رەسپۋبليكاسىن قورعاۋ – ونىڭ ءاربىر ازاماتىنىڭ قاسيەتتى پارىزى جانە مىندەتى» دەپ ايتىلعان. ياعني وتباسىلىق جاعدايعا، قورقاقتىعىنا بايلانىستى بارماي-اق قويسا بولادى دەگەن ءسوز جوق. ءاربىر ازاماتتىڭ قاسيەتتى پارىزى ەكەنىن ۇعۋ كەرەك. بۇل – وتان الدىنداعى، وتباسى الدىنداعى پارىز. اسكەر – سوعىس مايدانى ەمەس، شىڭدالۋ ورتاسى. ەل باسىنا كۇن تۋعان شاقتا تۋعان جەردى قورعاي بىلۋگە باۋليتىن ورتا. جىگىتتىك جىگەرى جوقتىعىنان اسكەردەن قاشقاندار وتانىنا ادال قىزمەت ەتە المايتىنى انىق»، - دەلىنگەن رەسمي حابارلامادا.

مينيسترلىكتىڭ مالىمەتىنشە، اسكەرگە بارىپ، وتان الدىنداعى پارىزدى وتەۋگە ءاربىر ازامات مىندەتتى.

«اسكەرگە بارۋدان قورقىپ جۇرگەندەرگە ايتارىمىز – قازىر بارلىق قارۋلى كۇشتەردە قۇقىق بۇزۋشىلىقتارعا جول بەرمەۋ شارالارى قولدانىلۋدا. بارلىق قۇرىلىمدار ءبىر شاقىرىلىمنىڭ اسكەري قىزمەتشىلەرىنەن جيناقتالادى. الىمجەتتىك بارلىق جەردە جويىلعان دەسەك تە بولادى. بارلىق كازارمالار اسكەري ءبولىم بويىنشا كەزەكشىگە شىعارىلعان بەينەباقىلاۋ جۇيەلەرىمەن جابدىقتالعان، بۇل جاعدايدى ۇنەمى قاداعالاپ وتىرۋعا مۇمكىندىك بەرەدى»، - دەيدى اتالعان ۆەدومستۆودان.

سونداي-اق رەسمي اقپاراتتا اسكەردە بولعان كەلەڭسىز جايتتار تۋرالى ءانونيمدى تۇردە حابارلاۋعا بولاتىنى ايتىلعان.

«ساربازدارعا باس جانە وڭىرلىك اسكەري قولباسشىلارى، تاربيە جانە الەۋمەتتىك-قۇقىقتىق جۇمىس بويىنشا ورىنباسارلارىنىڭ ۇيالى تەلەفون نومىرلەرى بەرىلەدى. ول نومىرلەرگە كەز كەلگەن ۋاقىتتا قوڭىراۋ شالىپ، SMS حابارلاما جازۋعا بولادى. سونداي-اق ءانونيمدى تۇردە حابارلاي الادى. كەلىپ تۇسكەن ءار ءوتىنىش بويىنشا تەكسەرىس جۇرگىزىلەدى. ەگەر ءتارتىپ بۇزۋشىلىق انىقتالسا، جەدەل شارا قولدانىلىپ، كەمشىلىكتەر جويىلادى»، - دەپ تولىقتىردى مينيسترلىكتەن.

Abai.kz