دەپۋتاتتاردىڭ ايماقتارعا ساپارى بارىسىندا قازاقستان حالقى اسسامبلەياسىنان ءماجىلىس دەپۋتاتى ناتاليا دەمەنتەۆا ماڭعىستاۋ وبلىسىنىڭ تۇرعىندارىمەن كەزدەستى.

ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەسى "ساربازدار انالارى" شتابىنىڭ وكىلدەرىمەن بىرلەسىپ، وبلىستا ورنالاسقان ۇلتتىق ۇلاننىڭ اسكەري بولىمدەرىنە، تەڭىز جاياۋ اسكەرلەرى مەن اۋە شابۋىلىنا قارسى قورعانىس بريگادالارىنا باردى.

كەزدەسۋگە قاتىسۋشىلار اسكەري قىزمەتشىلەردىڭ كازارمالارداعى تىنىس-تىرشىلىگىمەن، تاماقتانۋ، سونداي-اق اسكەري بولىمدەردىڭ ماتەريالدىق-تەحنيكالىق جاعدايىمەن تانىستى.

اڭگىمە بارىسىندا ناتاليا دەمەنتەۆا ەل باسشىلىعى جاۋىنگەرلىك قابىلەتتى ارميانى قالىپتاستىرۋ، اسكەري قىزمەتتىڭ بەدەلىن ارتتىرۋ جانە قارۋلى كۇشتەردى ماتەريالدىق جابدىقتاۋ ماسەلەلەرىنە ەرەكشە نازار اۋداراتىنىن اتاپ ءوتتى. سوڭعى ۋاقىتتا پارلامەنت اسكەري قىزمەتشىلەر مەن ولاردىڭ وتباسى مۇشەلەرىنىڭ قورعانىس قابىلەتىن ارتتىرۋعا جانە الەۋمەتتىك جاعدايىن جاقسارتۋعا باعىتتالعان بىرقاتار ماڭىزدى زاڭنامالىق اكتىلەردى قابىلدادى.

سونىمەن قاتار، ساپار بارىسىندا ءماجىلىس دەپۋتاتى، قازاقستان حالقى اسسامبلەياسى توراعاسىنىڭ ورىنباسارى ناتاليا دەمەنتەۆا وڭىردەگى ەتنومادەني بىرلەستىكتەردىڭ وكىلدەرىمەن جانە قحا قۇرىلىمدارىمەن كەزدەستى. ەتنومادەني بىرلەستىكتەردىڭ بەلسەندى وكىلدەرىنە ناتاليا دەمەنتەۆا رەفەرەندۋمدى دايىنداۋ مەن وتكىزۋگە، سونداي-اق قازاقستانداعى دوستىق پەن ەتنوسارالىق بىرلىكتى نىعايتۋعا بەلسەندى قاتىسقانى ءۇشىن العىس حاتتار تابىس ەتتى.

Abai.kz