تاياۋ شىعىس تاعى تىنىش ەمەس. قاقتىعىس تاريحى ءبىر عاسىرعا جۋىقتاعان يزرايل-پالەستينا اراسىنداعى اتىس-شابىس قايتا بۇرق ەتە قالدى. 

ءيزرايلدىڭ قورعانىس مينيسترلىگى جاقىن ارادا گازا ايماعىنداعى "يسلام جيھادى" ۇيىمىنىڭ وكىلدەرى يزرايل اۋماعىندا جارىلىس جاساۋى مۇمكىن دەگەن اقپاراتتىڭ بارىن ايتىپ، گازاداعى "يسلام جيھادى" ۇيىمىنىڭ وكىلدەرىنە اۋەدەن سوققى جاسادى. سوققى سالدارىنان ۇيىمنىڭ سولتۇستىك اسكەري قاناتىن باسقاراتىن قولباسشى شتابى مەن بىرنەشە ۇيىم وكىلدەرى جانە بەيبىت تۇرعىندار وپات بولدى.

"يسلام جيھادى" يزاريلگە جاۋاپ قاتاتىنىن، سوققى استىنا الىپ، ەۆرەيلەردىڭ ءومىرىن توزاققا اينالدىراتىنىن مالىمدەدى. ولار ءوز وپەراتسياسىن "بىرىككەن فرونت" دەپ اتادى. سەبەبى يزرايلگە قارسى شابۋىلعا تەك قانا يسلام جيھادى عانا ەمەس، سونىمەن بىرگە ء"ال-اقسا قورعاۋشىلارى", "دەموكراتيالىق فرونت" ۇيىمى دا قاتىستى. ال يزرايل ءوز وپەراتسياسىن ء"تاڭسارى" دەپ اتادى.

گازا ايماعىنان يزرايلگە 1100 زىمىران جىبەرىلگەنى، ونىڭ 96 پايىزىن "تەمىر كۇمبەز" زىمىرانعا قارسى جۇيەسى قاعىپ تۇسىرگەنى ايتىلۋدا. اتىلعان زىمىراننىڭ 180 داناسى يزرايل اۋماعىنا جەتپەي، گازانىڭ شەكاراسى مەن ەلدى-مەكەندەرىندە جارىلعان. زىمىران سوققىسىنان يزرايل جەرىندە قازا تاپقاندار جوق. ەكى ادامنىڭ جاراقات العانى جانە بىرنەشە ادامعا پسيحولوگيالىق كومەك كورسەتىلگەنى ايتىلۋدا.

يزرايل شابۋىلىنان گازا ايماعىندا 44 ادام قازا تاپقان. جۇزدەگەن ادام جاراقات الىپ، ونداعان عيمارات جويىلعان. يزرايل شابۋىلعا ۇشاق، سوققى جاساۋشى دروندار مەن ارتيللەريالىق قوندىرعىلاردى قولدانۋدا. حاماس-تىڭ باقىلاۋ بەكەتتەرىنە دە شابۋىل جاسالعان، الايدا حاماس اسكەري ءىس-قيمىلدارعا قاتىسپادى.

حاماس-تىڭ اسكەري قاقتىعىسقا قاتىسپاۋ سەبەبىن بىرنەشە سەبەپپەن تۇسىندىرۋگە بولادى. 2021 جىلى، مامىر ايىندا حاماس پەن يزرايل اراسىندا 11 كۇنگە سوزىلعان قاقتىعىس بولدى. حاماس ءوزىنىڭ جەڭگەنىن مالىمدەسە، يزرايل ءوز جەڭىسى جايلى حابارلادى. حاماس جيىنتىعى 6 مىڭعا جۋىق زىمىران جىبەردى، ونىڭ جۇزدەن استام زىمىرانى يزرايل عيماراتتارىنا نۇقسان كەلتىردى. ونىڭ ىشىندە اۋەجايلار، ۇشۋ الاڭدارى، قالا كوشەلەرى مەن تۇرعىن ۇيلەر، جاعاجايلار بار بولاتىن. "حاماس ءوزىنىڭ زىمىران قورىن تاۋىستى جانە ونى تولتىرۋعا ۇزاق ۋاقىت كەرەك" دەيدى ساراپشىلار. سوندىقتان دا ول قاقتىعىستارعا قاتىسۋعا ازىرگە نيەتتى ەمەس. حاماس، يزرايل جانە مىسىر اراسىندا ۇشجاقتى كەلىسىم جاسالىپ، قاقتىعىس اياقتالعان بولاتىن.

"يسلام جيھادى" مەن يزرايل اراسىندا دا ۇرىستى توقتاتۋ تۋرالى كەلىسىم جاسالدى. كەلىسىمدى جاساۋعا مىسىر مۇددەلى بولدى. نەگە مىسىر؟ سەبەبى گازا ايماعى تەك قانا ەكى ەلمەن شەكتەسەدى. ءبىرى يزرايل، ءبىرى مىسىر. گازاداعى الەۋمەتتىك جاعدايدىڭ ناشارلاۋى مىسىردىڭ گازامەن شەكتەسەتىن اۋماعىندا دا جاعدايدى كۇردەلەندىرە ءتۇسۋى مۇمكىن. يزرايل مەن گازا اراسىنداعى قاقتىعىستى توقتاتۋعا مىسىردىڭ ۇنەمى مۇددەلى بولاتىنى دا سوندىقتان.

يزاريل مەن "يسلام جيھادى" اراسىندا جاساسقان كەلىسىم بۇزىلۋى ىقتيمال. وعان تاراپتاردىڭ كەلىسىم ەرەجەلەرىن ۇستانباي، ءبىر-ءبىرىن اتقىلاۋدى توقتاتپاۋى سەبەپكەر بولماق.

Abai.kz