قوستانايدا ەلىمىزدەگى ەتەك الىپ كەتكەن قانت تاپشىلىعى پروبلەماسىن جەدەل ءارى تۇپكىلىكتى شەشەتىن تاماشا ءادىس ويلاپ تاپتى. وسىنداعى «توبول» (مۇندا بۇل اتاۋ ءدال وسىلاي اتالىپ، جازىلادى) الەۋمەتتىك-كاسىپكەرلىك كورپوراتسياسىنىڭ قىزمەتكەرلەرى مەن اكىمدىكتىڭ قىزمەتكەرلەرى وسىناۋ ءتاتتى ونىمگە دەگەن تاپشىلىقتى ءوز مۇددەلەرىنە پايدالانىپ، پايدا تاۋىپ قالۋدى كوزدەگەن كورىنەدى.

ولار وزدەرىمەن جاقسى قارىم-قاتىناستاعى كاسىپكەرلەردى تۇراقتاندىرۋ قورىنداعى قانتتى كيلوسىن ەڭ تومەنگى باعا - 420 تەڭگەدەن ۇلەستىرىپ جىبەرەدى.

ال الگى پىسىقاي كاسىپكەرلەر بولسا بۇل تاۋاردى وزگە بىرەۋلەرگە وسى قوردان الىنعان ونىمدەرگە قويىلاتىن 10 پايىزدىق ۇستەمەنىڭ ورنىنا، ونى ەكى ەسە باعا ساتىپ جىبەرىپ، مۇرتى ءبىر مايلاپ الادى. قالتالارى قالىڭداعاننان كەيىن، كوڭىلى بوسادى ما، كىم ءبىلسىن، بۇل «مىرزالار» اكىمدىك پەن «توبول» اكك قىزمەتكەرلەرىنە 100 كيلودان 500 كيلوعا دەيىن سىياقى ەسەبىندە ۇلەستىرىپتى.

جۇرتقا ارزان باعامەن ساتۋ ماقساتىمەن قۇرىلعان ولبىستاعى تۇراقتاندىرۋ قورىنداعى قانتتى وسىلايشا تالان-تاراجعا سالىپ، اكىمدىك قىزمەتكەرلەرى مەن «توبول» كورپوراتسياسى ەش قينالماستان ۇكىمەتتى الداپ، تەگىن دۇنيەگە ءبىر بايىپ قالار ما ەدى، كىم ءبىلسىن، ەگەر وبلىستىق سىبايلاس جەمقورلىققا قارسى كۇرەس دەپارتامەنتىنىڭ  قىزمەتكەرلەرى دەر كەزىندە قيمىلداپ، ولاردى تۇزاققا تۇسىرمەسە.

ال جالپى، قاراماعىنداعى قىزمەتكەرلەرىنىڭ وسىنداي «تاپقىرلىق تاسىلدەرىنەن» وبلىس اكىمى ارحيمەد مۇقانبەتوۆتىڭ حابارى بار ما ەكەن؟ الدە وسى ءوڭىردىڭ جەرگىلىكتى حالىققا مۇلدەم باعىنىشتى ەمەس ۇلكەن قوجايىنى مۇنداي ۇساق-تۇيەك دۇنيەلەرگە كوڭىل اۋدارۋعا قولى دا تيە بەرمەيتىن شىعار.

جايبەرگەن بولاتوۆ

Abai.kz