ماسكەۋ تۇركياعا س-400 زەنيتتى زىمىران كەشەنىنىڭ ەكىنشى پولكىن ساتقانىن مالىمدەدى. بۇل تۋرالى اسكەري-تەحنيكالىق ارىپتەستىك جونىندەگى فەدەرالدىق قىزمەت باسشىسى دميتري شۋگاەۆ حابارلاعان.

بۇنىڭ الدىندا انكارا كەشەننىڭ العاشقى پولكىن ساتىپ العان ۋاقىتتا اقش وعان قارسى سانكتسيا جاريالاعان. ۆاشينگتون مۇنداي كەشەندى ساتىپ الۋ ناتو-عا مۇشە ەلدىڭ مىندەتتەرىنە قايشى كەلەدى دەپ ەسەپتەيدى.

شۋگاەۆ اسكەري تەحنيكانى تۇركياعا ساتقانىن ماسكەۋدە "ارميا-2022" فورۋمىندا حابارلادى. شەنەۋنىك ساۋدا كەلىسىمى قاشان جاسالعانىن ايتپادى. ونىڭ مالىمدەۋىنشە، "كۇردەلى ساياسي جاعداي" "ارىپتەستەردىڭ رەسەيمەن قاتىناسىن قيىنداتتى", بىراق تۇركيامەن اسكەري-تەحنيكالىق ارىپتەستىك ۇزىلگەن جوق.

س-400 "تريۋمف" — ۇزاق جانە ورتا قاشىقتىققا ارنالعان زىمىران جۇيەسى. ول قارۋلى كۇشتەرگە 2007 جىلى قابىلداندى. قارۋدىڭ بۇل ءتۇرىن ماسكەۋ بۇنىڭ الدىندا قىتاي مەن ۇندىستانعا ساتقان، سيريادا قولدانعان. ماسكەۋ مەن انكارا كەشەندى ساتۋ تۋرالى كەلىسىمگە 2017 جىلى قول قويعان. تۇركيا ناتو-عا مۇشە ەلدەر اراسىندا وسىنداي قارۋ ساتىپ العان العاشقى ەل اتاندى.

ۆاشينگتون انكارادان زىمىران جۇيەسىنەن باس تارتۋىن بىرنەشە مارتە تالاپ ەتتى. تۇركيا بولسا وداقتاستار زىمىران كەشەنىن ارزان باعاعا ساتپاي وتىر دەپ جاۋاپ بەردى.

Abai.kz