تۇركىمەنستاندىق بەلسەندىلەر ادۆوكاتتاردىڭ جانە ەكى تۇرىك قۇقىق قورعاۋشىنىڭ قولداۋىمەن تۇركىمەنستاننىڭ ستامبۇلداعى كونسۋلدىعىنا بارىپ، پرەزيدەنت سەردار بەردىمۇحامەدوۆكە اشىق حات جولداۋعا ارەكەت جاسادى. ادام قۇقىقتارى جونىندەگى تۇركىمەن حەلسينكي قورى مالىمدەگەندەي، ناتيجەسىندە ولاردى ديپلوماتيالىق كورپۋس وكىلدەرى ساباپ تاستاعان.

"ادۆوكات گۇلدەن سونمەز جانە بەلسەندىلەر كۇزەتشىدەن حاتتى بەرۋ ءۇشىن قىزمەتكەرلەردىڭ ءبىرىن شاقىرۋدى سۇراعان. سول كەزدە التى قىزمەتكەر شىعىپ، ولاردى بالاعاتتاپ، ساباپ تاستاعان", - دەپ جازدى قور.

قۇقىق قورعاۋ ۇيىمى ديپلوماتيالىق كورپۋس وكىلدەرى ەكى ايەل مەن ءۇش ەر ادامدى ساباعانىن ايتادى. بەلسەندى اتامۋراد ساپاروۆ باسىنان اۋىر جاراقات الىپ، دارىگەرگە قارالعان.

تۇركىمەن ميگرانتتارىنا قۇقىقتىق كومەك بەرگەن تۇرىك ادۆوكاتى گۇلدەن سونمەز شىلدەدە ستامبۇلدىڭ چاگلايان سوتىنا تۇركىمەنستان بيلىگىنە، ونىڭ ىشىندە بۇرىنعى پرەزيدەنت گۋربانگۋلى بەردىمۇحامەدوۆكە قارسى قىلمىستىق ءىس قوزعاۋ بويىنشا شاعىم تاپسىرعان.

تۇركيادا تۇراتىن تۇركىمەنستاندىقتار كوپ جىلداردان بەرى مەرزىمى ءوتىپ كەتكەن تولقۇجاتتارىن جاڭارتا الماي، سونىڭ سالدارىنان تۇركيادا زاڭسىز جۇرۋگە ءماجبۇر. ونداعى تۇركىمەن كونسۋلدىعى تولقۇجاتتارىن جاڭارتۋدان باس تارتىپ كەلەدى.

تۇركيا بيلىگىنىڭ رەسمي مالىمەتى بويىنشا، ولكەدە ءجۇز مىڭعا جۋىق تۇركىمەنستاندىق بار. بىراق ولاردىڭ كوبىنىڭ قۇجاتتارىنىڭ مەرزىمى ءوتىپ كەتكەندىكتەن، ناقتى سانىن ايتۋ قيىن. تۇركىمەنستان بيلىگى بولسا، ميگراتسيا بويىنشا ەشقانداي مالىمەت جاريالامايدى.

Abai.kz