پرەزيدەنت توقاەۆ رەسەيگە باردى. سوچي قالاسىندا رەسەي پرەزيدەنتى ۆلاديمير پۋتينمەن ەكى ساعاتتان استام ۋاقىتقا سوزىلعان كەزدەسۋ ءوتتى.

بۇل كەزدەسۋدى رەسەيلىكتەر ءجىتى قاداعالادى. سەبەبى دە جوق ەمەس. سوڭعى كەزدەسۋدە قازاقستان پرەزيدەنتى رەسەيدىڭ اگرەسسيالىق ساياساتىن جاقتامايتىنىن بىلدىرگەن ەدى. لۋگانسك پەن دونەتسك سەپاراتيستەرىن مويىندامايتىنىن، سانكتسيالاردى اينالىپ وتۋگە جول بەرمەيتىنىن، رەسەي ساياساتكەرلەرىنىڭ ارانداتۋشى سوزدەرى رەسەيدىڭ وزىنە زياندى ەكەنىن ايتتى. بۇل مالىمدەمەنى رەسەي قوعامى مەن بيلىگى "سوققى" دەپ قابىلدادى. بۇل جولى ونداي وتكىر مالىمدەمەلەر ايتىلمايتىنى انىق ەدى.

توقاەۆ ءسوز اراسىندا شەكارانى قۇجاتپەن بەكىتىپ العانىن ايتتى. بۇل رەسەيلىك ساياساتكەرلەردىڭ ۇنەمى اۋماقتىق تۇتاستىعىمىزعا قارسى مالىمدەمەلەرىنە قارسى جاسالعانداي. "گەوساياسي جاعدايدىڭ ەرەكشەلىگى ۇكىمەتتەرىمىزگە قوسىمشا نۇسقاۋلار بەرۋ ءۇشىن كەلىسىپ الۋ قاجەت ەكەنىن كورسەتىپ وتىر. ولار ءبىر-بىرىمەن تابىستى قىزمەت ەتىپ كەلەدى. دەگەنمەن ءومىردىڭ ءوزى جاڭا مىندەتتەر قويادى جانە ولار شەشۋدى قاجەت ەتەدى. جالپى، ءبىزدىڭ ىنتىماقتاستىعىمىزدىڭ دامىپ كەلە جاتقانىنا قاناعاتتانۋعا تولىق نەگىز بار. مەن بۇل تۇرعىدا سىزبەن كەلىسەمىن. ءبىزدى ورتاق شەكارا بىرىكتىرەدى. ول – الەمدەگى ەڭ ۇزىن، قۇرلىقتاعى تولىعىمەن دەليميتاتسيالانعان شەكارا. ءبىزدىڭ ىنتىماقتاستىعىمىزدىڭ بولاشاعىنا قاتىستى پەسسيميستىك بولجامدار جاساۋعا، ارينە، نەگىز جوق! مەن قازاقستان رەسپۋبليكاسىنىڭ پرەزيدەنتى رەتىندە بارلىق سالالارداعى ەكىجاقتى ىنتىماقتاستىعىمىزعا قوسىمشا سەرپىن بەرۋگە نيەتتىمىن", – دەدى قاسىم-جومارت توقاەۆ.

پۋتين دە ەكى ەل اراسىنداعى قاتىناستىڭ اسا ماڭىزدى ەكەنىن باسا ايتىپ، بىلاي دەدى: "شاقىرۋىمدى قابىل العانىڭىزعا راقمەت. ءبىز ەكەۋىمىز ۇنەمى كەزدەسىپ تۇرامىز. جاقىندا عانا جۇزدەسكەن ەدىك، بىراق سوچيدە كەزدەسۋگە كەلىستىك. الدىمىزدا وتە اۋقىمدى جۇمىس بار. ال بيىل ەرەكشە جىل. ءبىز قازان ايىندا ديپلوماتيالىق قارىم-قاتىناستىڭ 30 جىلدىعىن اتاپ وتەمىز. وسى داتاعا وراي ءتۇرلى ءىس-شارالار جوسپارلانىپ وتىر. ءبىزدىڭ مينيسترلىكتەر مەن ۆەدومستۆولار بەلسەندى جۇمىس ىستەپ جاتىر. ۇكىمەتارالىق كوميسسيا قارقىندى جۇمىس ىستەپ كەلەدى. سىرتقى ىستەر، قورعانىس مينيسترلىكتەرى بىرلەسىپ ءتۇرلى ءىس-شارالاردى، سونىڭ ىشىندە ۇقشۇ اياسىنداعى بىرلەسكەن وقۋ-جاتتىعۋلاردى جانە تاعى باسقالارىن دايىنداپ جاتىر. تاۋار اينالىمى ءوسىپ كەلەدى. بىلتىر 34,4 پايىزعا وسسە، بيىل بەس ايدا 9 پايىزعا دەرلىك، 8,8 پايىزعا ءوستى. ينۆەستيتسيالار ەكى جاقتان دا ارتىپ كەلەدى. مەنىڭشە، رەسەي ينۆەستيتسياسى 18 ميلليارد دوللارعا جەتتى، ال قازاقستاننىڭ رەسەيگە سالعان ينۆەستيتسياسى ءتورت جارىم ميلليارد شاماسىندا. قازاقستاننىڭ ساۋدا-ەكونوميكالىق سەرىكتەستەرى اراسىندا رەسەي ءبىرىنشى ورىندا تۇر. بىزدە سونداي-اق جاقسى ءىرى جوبالار دامىپ جاتىر. جوعارى تەحنولوگيالىق سالالاردا، سونىڭ ىشىندە عارىش سالاسىندا جۇمىس ىستەيمىز. جالپى، جۇمىس بارلىق باعىت بويىنشا ايتارلىقتاي قارقىندى ءارى وڭ باعىتتا ءجۇرىپ جاتىر. ءبىزدىڭ كەزدەسۋىمىز، ارينە، سەنىمدى ستراتەگيالىق سەرىكتەستىگىمىزدى دامىتۋعا قوسىمشا سەرپىن بەرەتىنىنە وتە قۋانىشتىمىن", – دەدى رەسەي باسشىسى.

كەزدەسۋ تىم ۇزاققا سوزىلمايدى جانە قانداي دا ءبىر ماڭىزدى قۇجاتتارعا قول قويىلمادى. سالتاناتتى كەشكى اس تا بولمادى.

Abai.kz