باستىقتىڭ ورنىنا ءموبيلدى قوسىمشا. قازاقستانداعى ەڭبەك نارىعى قالاي وزگەردى؟

ماشكەەۆيچ، ميتتال مەن تشو ءداۋىرى ارتتا قالدى. ەندى الەكساندر انيكين مەن ول باسقاراتىن ياندەكس.Go قازاقستانداعى ەڭ ءىرى جۇمىس بەرۋشىگە اينالماق.

ەگەر ياندەكس.Go قازاقستاندىق زاكاز ورىنداۋشىلارىن (تاكسيستەر مەن كۋرەرلەر) تىكەلەي كەلىسىم-شارتقا وتىرعىزسا، وندا بىردەن ەلىمىزدەگى ءنومىرى ءبىرىنشى جۇمىس بەرۋشى اتاناتىن بولادى. سەبەبى - قازىر ياندەكس سيستەماسىندا قازاقستاندا 150 مىڭ ادام جۇمىس ىستەيدى.

بۇعان دەيىن 65 مىڭ ادامى بار ERG ەلدەگى ەڭ ءىرى جۇمىس بەرۋشى بولىپ سانالىپ كەلدى. ودان كەيىن تشو (40 مىڭ جۇمىسشى), ءۇشىنشى ورىندى 37 مىڭ قىزمەتكەرى بار "ارسەلورميتتال تەمىرتاۋ" جاۋىپ وتىردى.

وسى ۇشەۋىنىڭ قازاقستانداعى بارلىق جۇمىسشىلارىن قوسساق، ءبىر ياندەكسكە جەتپەيدى. بىراق ياندەكس پلاتفورماسىنا تىركەلگەندەر "قىزمەتكەر" ستاتۋسىنا يە ەمەس، سوندىقتان ولار الەۋمەتتىك قورعاۋعا الىنباعان. قازىر تسيفرلىك دامۋ مينيسترلىگى ارقىلى قازاقستان وسى ادامداردى جۇمىسشى رەتىندە تانۋ بويىنشا ياندەكسپەن كەلىسسوز جۇرگىزە باستادى.

ەگەر ول ءساتتى اياقتالسا:
1) الەۋمەتتىك قامتۋ جۇيەسى ۇلكەن وزگەرىسكە ۇشىرايدى;
2) زەينەتاقى جۇيەسى بىردەن ۇلعايادى;
3) ءوزىن-ءوزى قامتىعاندار ساناتى قىسقارىپ، ناقتى جۇمىسشىلار سانى ارتادى.

ياندەكستىڭ بۇعان قالاي جاۋاپ بەرەرى ازىرگە بەلگىسىز. ەگەر تاراپتار كەلىسە الماي جاتسا، وندا ياندەكس كوميسسياسى ەسەبىنەن الەۋمەتتىك ساقتاندىرۋدىڭ مەملەكەتتىك قورىنا اقشا اۋدارىپ وتىرۋعا بولادى. ءبىر سوزبەن، ياندەكس 20 پايىز كوميسسيا السا، سونىڭ 15 پايىزى ياندەكسكە، 5 پايىزى مەملەكەتكە كەتەتىندەي جاساۋعا دا بولار ەدى.

ايبار ولجاەۆ

Abai.kz