وقۋ جىلى باستالىسىمەن رەسپۋبليكاداعى جوعارى جانە كاسىبي وقۋ ورىندارىنا ستۋدەنتتەر اعىلىپ كەلە باستايدى. ولاردىڭ ۋايىمى دا، باس اۋرۋى دا – جاتاقحانا الۋ ماسەلەسى. اسىرەسە، ەلىمىزدەگى تانىمال جوعارى وقۋ ورىندارى ورنالاسقان ءىرى قالا الماتى ستۋدەنتتەردىڭ كوپ جينالاتىن مەكەنىنە اينالعان.

قالا اكىمى ەربولات دوساەۆتىڭ ايتۋىنشا، الماتىنىڭ وزىندە 14-35 جاس ارالىعىنداعى 700 مىڭداي ادام ادام تۇرادى. بۇل شاھار تۇرعىندارىنىڭ 37 پايىزى ەكەن. ەلىمىزدەگى ستۋدەنتتەردىڭ 30 پايىزى الماتىدا وقيدى. سوندىقتان الماتى جاستار مەن ستۋدەنتتەردىڭ قالاسى. ال، مەكتەپ قابىرعاسىنەن ەندى عانا تۇلەپ ۇشقان جاس تالاپكەرگە ساباعىنا قينالماي بارىپ-كەلۋ ءۇشىن، ۇلگەرىمى جوعارى بولۋ ءۇشىن تۇراتىن جايلى ورىن كەرەك. بىلتىرعى وقۋ جىلىندا جاتاقحانا تاپشىلىعى 32 مىڭ ورىندى قۇراعان. الماتىنىڭ 36 جوعارى وقۋ ورنىندا 182 مىڭ ستۋدەنت وقىعان. ونىڭ ىشىندەگى 112 مىڭ ءبىلىم الۋشى باسقا وڭىرلەردەن كەلگەن. ال، بيىل وقۋ گرانتتارىنىڭ كوپتەپ بولىنۋىنە قاراي وزگە ايماقتاردان كەلەتىن تالاپكەرلەر سانى 125 مىڭعا دەيىن ارتۋى مۇمكىن. وسىعان وراي الماتىنىڭ ءتورت جوعارى وقۋ ورنىنىڭ جانىنان جاتاقحانا سالۋ جوسپارلانعان.  ل. ب. گونچاروۆ اتىنداعى قازاق اۆتوموبيل-جول ينستيتۋتى جاتاقحانا قۇرىلىسىنا كىرىسسە، قازۇۋ، اباي اتىنداعى قازۇپۋ مەن حاتۋ جاتاقحانا سالۋعا دايىندىق جۇرگىزىپ جاتىر. اكىم ەربولات دوساەۆ ۋنيۆەرسيتەتتەرگە قۇرىلىس جۇمىسىن جەدەلدەتۋدى تاپسىردى.

عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆتىڭ مالىمدەۋىنشە، جاڭا وقۋ جىلىندا رەسپۋبليكا بويىنشا 89 مىڭ ستۋدەنتكە جاتاقحانادا ورىن جەتىسپەيتىنى انىقتالدى. اسىرەسە الماتى مەن نۇر-سۇلتان قالالارىندا جاتاقحانا تاپشىلىعى قاتتى بايقالادى. الماتىدا 37 مىڭعا جۋىق ستۋدەنتكە تۇراتىن جەر كەرەك بولسا، ەلوردادا 14 مىڭ ستۋدەنتكە جاتاقحانا قاجەت. اتاپ ايتقاندا:

ءال-فارابي اتىنداعى قازاق ۇلتتىق ۋنيۆەرسيتەتىندە 15 122 ورىن; قازاق ۇلتتىق قىزدار پەداگوگيكالىق ۋنيۆەرسيتەتىندە 4 500 ورىن; اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە  4 000 ورىن; قانىش ساتپاەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىندە 3 000 ورىن; لەۆ گۋميلەۆ اتىنداعى ەۋرازيالىق ۇلتتىق ۋنيۆەرسيتەتىندە 5 000 ورىن جەتىسپەيدى.

«ستۋدەنت جاستاردىڭ ءومىر ءسۇرۋ جاعدايىن جاقسارتۋ ءۇشىن 2018 جىلدان باستاپ جاڭا جاتاقحانالار سالىنىپ جاتىر. وسى باستامانى ىسكە اسىرۋ باستالعاننان بەرى 20 جوو-دا 700-دەن استام توسەك-ورىنعا ارنالعان 93 نىسان، ونىڭ ىشىندە 2022 جىلى 1470 توسەك-ورىنعا ارنالعان 6 نىسان پايدالانۋعا بەرىلدى»، – دەيدى ۆيتسە-مينيستر تالعات ەشەنقۇلوۆ.

ماسەلەنى بىرجاقتى ەتۋ ءۇشىن قازىرگى تاڭدا ءارتۇرلى شەشىمدەر قاراستىرىلىپ جاتىر. وسىعان بايلانىستى قر عىلىم جانە جوعارى ءبىلىم ءمينيسترى ساياسات نۇربەك جاتاقحانا تاپشىلىعىن شەشەتىن وڭتايلى ۇسىنىستار كوتەرگەن بولاتىن.

«بىرىنشىدەن، قازىرگى تاڭدا «قارجى ورتالىعى» اق جەكە ينۆەستورلارمەن جۇمىس ىستەيتىن قارجى وپەراتورى بولىپ سانالادى. بىراق، جەكە ينۆەستورلار قازىر جاتاقحانالار سالۋ ماسەلەسىنە كۇمانمەن قارايدى. قۇرىلىس ماتەريالدارىنىڭ باعاسى ءوسىپ كەتتى، «قارجى ورتالىعىنىڭ» شارتتارى دا ينفلياتسيانى كوزگە العاندا قولايلى ەمەس. ءبىز «قارجى ورتالىعىمەن» بىرنەشە شارتتى وزگەرتىپ جاتىرمىز. مىندەتتەمەلەردى 8 جىلدان 6 جىلعا قىسقارتامىز. ايلىق كورسەتكىشتەردى كوتەرەمىز، بۇل – قارجى مينيسترلىگىمەن پىسىقتايتىن شارۋا.

ەكىنشىدەن، قازىرگى تاڭدا ءال-فارابي اتىنداعى قازاق ۇلتتىق ۋنيۆەرسيتەتىنىڭ جاقسى ءبىر ۇلگىسى بار. الماتىدا ورنالاسقان جەكە قوناقۇيلەر مەن حوستەلدەردى جيناپ، ولارمەن ارنايى كەلىسىمشارتقا وتىرىپ جاتىر. قوناقۇيلەر مەن حوستەلدەرگە دە ىڭعايلى. ءبىز مىندەتتى تۇردە ولارعا 100 پايىزدىق تاپسىرىس بەرەمىز. ولارمەن قارجى مودەلدەرى دە تۇزەلەدى. وسى جوبانى ءبىز قازىر بۇكىل وڭىرلىك ۋنيۆەرسيتەتتەرمەن پىسىقتايمىز.

ۇشىنشىدەن، ارينە، جەكە ينۆەستورلارسىز بۇل ماسەلە تولىققاندى شەشىلمەيدى. سوندىقتان، ءىرى-ءىرى قۇرىلىس كومپانيالارىمەن، وڭىرلىك قۇرىلىس كومپانيالارىمەن جەكە-جەكە جۇمىس ىستەيمىز. مەملەكەت-جەكەمەنشىك ارىپتەستىگى اياسىندا، باسقا دا شارتتار ارقىلى وڭىرلىك ۋنيۆەرسيەتتەرمەن بىرىگىپ جاتاقحانالار قۇرىلىسىن قولعا الامىز»، - دەدى مينيستر.

قازىرگى تاڭدا مينيستر ساياسات نۇربەكتىڭ ۇسىنىسى بويىنشا، الماتىدا جوعارى وقۋ ورىندارىمەن ىنتىماقتاستىققا دايىن حوستەلدەردى، قوناق ۇيلەردى، جەكە جاتاقحانالاردى ىزدەۋ تۋرالى شەشىم قابىلداندى. سونداي-اق بيىل قارجى ورتالىعىنىڭ جوباسىمەن الماتىدا 3 جوعارى وقۋ ورنى اۋماعىندا قۇرىلىسى ءجۇرىپ جاتقان جاتاقحانالار پايدالانۋعا بەرىلەدى. قارجى ورتالىعى ۇيىمداستىرعان جوبانىڭ ارقاسىندا ەلىمىزدە 2019 جىلى 9 مىڭ 166 ورىندىق 10 جاتاقحانا، 2020 جىلى 20 مىڭ 266 ستۋدەنتكە ارنالعان 75 جاتاقحانا، بىلتىر 30 مىڭ 630 ورىنعا ارنالعان 124 ستۋدەنتتەر ءۇيى سالىنعان بولاتىن.

Abai.kz