بيىلعى وقۋ جىلى مەكتەپ وقۋشىلارى ءۇشىن ۇلكەن جاڭالىقتارمەن باستالماق. مەكتەپ باعدارلاماسىنداعى وزگەرىستەرمەن قاتار، كوپتەگەن جاڭا مەكتەپتەر دە بوي كوتەرمەك.

وقۋ-اعارتۋ مينيسترلىگىنىڭ مالىمەتىنشە 2022-2023 وقۋ جىلىندا رەسپۋبليكادا 3,6 ملن بالا 7 637 مەكتەپكە ءبىلىم الۋعا بارادى. بالالارى ءبىرىنشى سىنىپ تابالدىرىعىن اتتايتىن اتا-انالار 400-دەي ءوتىنىش تۇسىرگەن. سونىڭ 70 پايىزى بالالارىنىڭ قازاق تىلىندە وقىتقىسى كەلەدى ەكەن. بۇل وتە قۋانتارلىق جاعداي. وقۋ-اعارتۋ مينيسترلىگى ورتا مەكتەپتەردىڭ وقۋ جۇيەسىنە رەفورما جاساپ، قوردالانعان ماسەلەلەردى شەشۋ جولدارىن ۇسىندى.

مينيسترلىكتىڭ شەشىمىمەن ءۇش اۋىسىمدا ىستەيتىن ءبىلىم وشاقتارىنان باسقا مەكتەپتەر بەس كۇندىك وقۋ فورماتىنا اۋىسادى.

«1,5 ميلليونعا جۋىق بالا قازىرگىدەي اپتاسىنا 6 كۇن ەمەس، 5 كۇن عانا وقيدى. ياعني، ولارعا ساباق بەرەتىن 150 مىڭداي مۇعالىم دە اپتاسىنا 5 كۇن ساباق بەرەدى. بۇل شامامەن 1700 مەكتەپ دەگەن ءسوز. 100-دەن استام مەكتەپ ءۇش اۋىسىمنان بوسايدى. 3,6 ملن وقۋشىنىڭ كۇندەلىكتى جۇكتەلىمى ازايادى. وسىلايشا بۇگىنگە دەيىن اپتاسىنا التى كۇن وقىپ كەلگەن وقۋشىلاردىڭ سانىن مەيلىنشە قىسقارتتىق. قالعان از عانا كونتينگەنتتىڭ جۇكتەمەسىن ازايتۋ شارالارىن قاراستىرامىز»، - دەدى وقۋ-اعارتۋ ءمينيسترى اسحات ايماعامبەتوۆ.

الماتى مەكتەپتەرى دە وزگەرىستەن قالىس قالماي، بەس كۇندىك وقۋ فورماتىنا تولىقتاي اۋىسادى. بۇل تۋرالى وڭىرلىك كوممۋنيكاتسيالار قىزمەتىنىڭ بريفينگىندە الماتى قالاسى ءبىلىم باسقارماسى باسشىسىنىڭ ورىنباسارى ايدىن سايلاۋباي ايتتى.

«2022-2023 وقۋ جىلىنان باستاپ الماتى مەكتەپتەرى بەس كۇندىك وقۋ رەجيمىنە اۋىسادى، ال، وقۋ جىلى بۇرىنعىداي 25 مامىردا ەمەس، 31 مامىردا اياقتالماق».

ول سونداي-اق جاڭا وقۋ جىلىنىڭ وزگە دە وزگەرىستەرىن اتاپ ءوتتى.

«ورىس ءتىلى 2- سىنىپتان باستاپ وقىتىلسا، اعىلشىن ءتىلى 3- سىنىپتاپ باستاپ وقىتىلادى. قازاق تىلىندە ءبىلىم بەرەتىن مەكتەپتەر بالالارعا «الىپپە» مەن «انا ءتىلى» پاندەرىن وقىتادى. ال، ورىس تىلىندە وقىتاتىن مەكتەپتەردە "الىپپە","قازاق ءتىلى" جانە  "ساۋاتتىلىققا وقىتۋ" پاندەرى وقىتىلادى»،-دەيدى ايدىن سايلاۋباي

قازاقستاننىڭ وقۋ-اعارتۋ جۇيەسىن ىلگەرىلەتۋ شارالارى ءجۇرىپ جاتقانىمەن، ورتا مەكتەپ وقۋشىلارى باراتىن مەكتەپ عيماراتتارىنىڭ جەتىسپەۋشىلىك ماسەلەسى تولىق شەشىلمەي تۇر. قازىرگى كەزدە ەلىمىزدە 280 مىڭداي بالاعا مەكتەپتە ورىن جەتپەيدى ەكەن. ال 2025 جىلعا قاراي بۇل سان 1 ميلليونعا جەتۋى مۇمكىن. سوندىقتان بىلتىر پرەزيدەنت قاسىم-جومارت توقاەۆتىڭ تاپسىرماسىمەن «1000 مەكتەپ» جوباسى ىسكە قوسىلدى. ءبىر جىلدا رەسپۋبليكا بويىنشا 270 مەكتەپ سالىندى. بيىلعى جىلى 225 مەكتەپ قولدانىسقا بەرىلەدى دەپ جوسپارلانۋدا.

الماتىدا ءبىرىنشى قىركۇيەكتەن باستاپ ءۇش جاڭا مەكتەپ وقۋشىلارعا ەسىگىن ايقارا اشپاق. الماتى قالاسى ءبىلىم باسقارماسى باسشىسىنىڭ ورىنباسارى ايدىن سايلاۋبايدىڭ ايتۋىنشا، شاھار مەكتەپتەرىندەگى ورىن تاپشىلىعىن ازايتۋ شارالارى قارقىندى تۇردە ءجۇرىپ جاتىر.

«1 قىركۇيەكتەن باستاپ قالقامان، سايالى جانە توميريس شاعىن اۋداندارىندا 5100 ورىندىق 3 جاڭا مەكتەپ جانە №191, 146, 125, 875 ورىندىق قوسىمشا قۇرىلىستار اشىلادى", - دەدى ايدىن سايلاۋباي.

بۇگىندە مەكتەپتەردەگى ورىس سانى – 19 611 جەتەدى. قالادا جالعىز ءۇش اۋىسىمدا جۇمىس ىستەيتىن مەكتەپ –  №196 مەكتەپ. بۇل وقۋ وشاعىنىڭ ماسەلەسىن شەشۋ ءۇشىن مادەنيەت شاعىن اۋدانىندا 1500 ورىندىق جاڭا مەكتەپ سالىنادى. جىل سوڭىنا دەيىن 6000 ورىندىق تاعى دا 4 مەكتەپ قالقامان-2, قايرات، دارحان، نۇركەنت شاعىن اۋداندارىندا اشىلادى. سونىمەن قاتار قالاداعى №48 جانە №9 مەكتەپتەرگە جاقىن ورنالاسقان قۇرىلىس نىساندارى پايلادانۋعا بەرىلمەك. اكىمدىك بوستاندىق جانە ناۋرىزباي اۋداندارىنان 1800 ورىندى قامتيتىن مەكتەپتەردى اشۋ ءۇشىن ەكى عيمارات ساتىپ الۋدى جوسپارلاپ وتىر.

سونداي-اق، جەكە قاراجات ەسەبىنەن وقۋ جىلىنىڭ باسىندا 3250 ورىندىق 6 مەكتەپ پايلانۋعا بەرىلەدى. ولار: اۋەزوۆ اۋدانىنداعى 280 ورىندىق "دوستىق" مەكتەبى، مەدەۋ اۋدانىنداعا 200 ورىندىق "ۆۋندەر اكادەميا" مەكتەبى، ناۋرىزباي اۋدانىنداعى 590 ورىندىق "زامان" مەكتەبى، تۇركسىب اۋدانىنداعى 400 ورىندىق ميللەنيۋم مەكتەبى جانە قالعان 2 مەكتەپ جىل سوڭىنا قاراي اشىلماق. بۇگىندە الماتى قالاسىنىڭ قۇرىلىس باسقارماسى توعىز مەكتەپتى قالپىنا كەلتىرىپ، كۇردەلى جوندەۋ جۇمىستارىنان وتكىزىپ، سەيسميكالىق نىعايتۋ جۇمىستارىن جۇرگىزۋدە. ولاردىڭ ىشىندە ەكى مەكتەپتىڭ، №166 مەن №129 مەكتەپتىڭ، جوندەۋ جۇمىسىن وقۋ جىلىنىڭ باسىندا اياقتايدى.

الماتىدا مەكتەپ عيماراتتارىن عانا ەمەس وقۋشىلاردىڭ سپورت الاڭدارىن دا جاڭالاۋ جۇمىستارى جۇرگىزىلمەك. «مەكتەپ سپورت الاڭدارىن جاڭعىرتۋ» جوباسىن ىسكە اسىرۋعا قالاداعى 15 مەكتەپكە جەرگىلىكتى بيۋدجەتتەن 1 ملرد تەڭگە ءبولىندى. جاڭعىرتۋ جۇمىستارى وقۋ جىلى باستالعانعا دەيىن اياقتالادى دەپ كۇتىلۋدە.

Abai.kz