بۇل تۋرالى 3 قىركۇيەكتە ۇكىمەت وتىرىسىندا ىشكى ىستەر ءمينيسترى مارات احمەتجانوۆ مالىمدەدى.
مينيستر بۇل وزگەرىستەر "وتباسىلىق زورلىق-زومبىلىق قىلمىسىنا جازانى كۇشەيتۋ" دەپ سانايدى.
"بۇل اكىمشىلىك قۇقىق بۇزۋ بويىنشا ەڭ ازى بەس كۇنگە قاماپ، ءتارتىپ بۇزۋ قايتالانسا 20-25 كۇنگە قاماۋ جازاسىن ەنگىزۋدى جوسپارلاپ وتىرمىز. بۇعان قوسا، تۇرمىستاعى زورلىق-زومبىلىق بويىنشا شاعىم جازۋ فورماسىنان انىقتاۋ فورماسىنا كوشپەكپىز" دەدى مينيستر ۇكىمەت وتىرىسىندا.
احمەتجانوۆ وتباسىندا زورلىق-زومبىلىق جاساعانداردى قوعامدىق جۇمىسقا تارتۋدى ء"تارتىپ بۇزۋشىلاردى ءوز قىلىعىن باقىلاۋعا سەبەپ بولادى" دەپ سانايدى.
1 قىركۇيەكتە قازاقستان پرەزيدەنتى قاسىم-جومارت توقاەۆ حالىققا جولداۋىندا وتباسىلىق-زورلىق زومبىلىق جاساعاندارعا جازانى كۇشەيتۋدى تاپسىرعان ەدى. جولداۋدا توقاەۆ وتباسىنداعى زورلىق-زومبىلىقتى انىقتاۋ قيىن بولعاندىقتان ورگاندار بۇل ارەكەتتى قىلمىس دەپ تانۋعا كۇمانداناتىنىن مالىمدەگەن. ال ىشكى ىستەر ءمينيسترى ەندى تۇرمىستىق زورلىق-زومبىلىقتى انىقتاۋ فورماسىنا كوشۋ جوسپارى جايلى ايتادى.
2017 جىلى قازاقستان وتباسىنداعى الىمجەتتىك تۋرالى باپتاردى قىلمىستىق كودەكستەن الىپ تاستاعان. 2017 جىلى 3 شىلدەدە قازاقستاننىڭ سول كەزدەگى پرەزيدەنتى نۇرسۇلتان نازارباەۆ "ساباۋ" جانە "دەنساۋلىققا جەڭىل دارەجەدە زاقىم كەلتىرۋ" باپتارىن قىلمىستىق كودەكستەن اكىمشىلىك كودەكسكە اۋىستىرۋ تۋرالى زاڭعا قول قويعان. وعان دەيىن وتباسىنداعى الىمجەتتىك قىلمىس رەتىندە قارالىپ، كىنالىلەر 226 900 – 453 800 تەڭگە ارالىعىندا ايىپپۇل تولەيتىن نەمەسە ەكى ايعا دەيىنگى مەرزىمگە قامالاتىن.
قۇقىق قورعاۋشىلار، حالىقارالىق ۇيىمدار مەن بەلسەندىلەر بيلىكتەن بىرنەشە جىلدان بەرى وتباسىنداعى زورلىق-زومبىلىقتى قايتا قىلمىس دەپ تانۋدى تالاپ ەتىپ كەلەدى.
ال HRW "بيلىكتىڭ ايەلدى وتباسىنداعى زورلىق-زومبىلىقتان زاڭ جۇزىندە قورعاماۋى قازاقستاننىڭ ادام قۇقىعى سالاسىنداعى مىندەتتەمەسىنە قايشى كەلەدى" دەپ ەسەپتەيدى.
Abai.kz
