ابيلوۆپەن اراداعى سوتقا قاتىستى الماتى قالالىق سوتىنىڭ قاۋلىسى شىقتى، قولدانىستاعى زاڭناماعا سايكەس، سوت شەشىمدەرى ەندى زاڭدى كۇشىنە ەندى.

الدىڭعى جولى ايتقام، سۇراقتار بولسا جاۋاپ بەرەمىن دەپ، سولارعا قىسقاشا جاۋاپ بەرەيىن;

1. نەگە ءىس ورىس تىلىندە، ينتەرۆيۋ قازاقشا عوي؟

- ينتەرۆيۋ قازاق تىلىندە بولعاندىعى سەبەپتى، مەندە شاعىمدى قازاق تىلىندە بەرگەم، بىراق قر اقبتك-نىڭ 744 بابى، 1 بولىگىنە سايكەس، قۇقىق بۇزۋشى قاي تىلدە جاۋاپ بەرسە، ءىس سول تىلدە جۇرەدى. ابيلوۆ وزىنە ىڭعايلى ورىس ءتىلىن تاڭدادى.

2. ابيلوۆ پرەزيدەنتىككە كانديدات رەتىندە تۇسسە، بۇل ءىس وعان كەدەرگى بولماي ما؟

- جوق، قولدانىستاعى كونستيتۋتسيانىڭ 41 بابى، «سايلاۋ تۋرالى» كونستيتۋتسيالىق زاڭنىڭ 4 بابىندا ونداي شەكتەۋلەر قاراستىرىلماعان.

3. بۇل بولاشاقتا ءسوز بوستاندىعىنا شەكتەۋ قويۋعا اكەپ سوقپاي ما؟

- ءسوز بوستاندىعى – ول ءسوز يەسىنىڭ بارلىق جاۋاپكەرشىلىكتەن بوساتىلۋى دەگەندى بىلدىرمەيدى. جالا جاپقانى، ادامنىڭ ار-ۇجدانى، ابىرويىنا تيىسكەنى، مازاق قىلعانى ءۇشىن جاۋاپكەرشىلىك الەمنىڭ بارلىق دامىعان ەلدەرىنىڭ زاڭدارىندا قاراستىرىلعان. وعان زاماناۋي زاڭدارىمىزدىڭ جانە دەموكراتيانىڭ باستاۋى دەپ تانىلعان فرانتسۋز رەۆوليۋتسياسىنان باستاپ شىققان بارلىق ۇلى ەڭبەكتەر مەن تراكتاتتاردى وقىساڭىز دا وڭاي كوز جەتكىزەسىز.

4. ەندى سىزگە ءتىل تيگىزگەن بارلىق اداممەن وسىلاي سوتتاسا بەرەسىز بە؟

- جوق ارينە، ادامدار مىنەزىنە بايلانىستى جەتەكشى جانە جەتەككە ەرۋشى بولىپ ەكى تيپكە بولىنەدى (ۆەدومىە ي ۆەدۋششيە). جەتەككە ەرەتىندەر كوپشىلىكتى قۇرايدى. ولار وزدىگىنەن ىزدەنبەيدى، باس قاتىرمايدى، بەلگىلى تۇلعالار باسقالار تۋرالى نە ايتسا، سونى سول قالپىندا قابىلدايدى. سوندىقتاندا ول تيپتەگى ادامداردىڭ ءسوزىن كوڭىلگە الىپ كەرەگى جوق. ال بولات ابيلوۆ بولسا – ول قوعامدىق-ساياسي ورتادا پىكىر قالىپتاستىرا الاتىن، جەتەكشى رولگە يە ادام. وسىنداي تۇلعالار كوپشىلىككە قاراتا ايتقان سوزدەرىنە نازار اۋدارسا، ەل الدىنداعى جاۋاپكەرشىلىگىن سەزىنسە دەگەن وي مەنىكى. ەكىنشى ماقساتىم – وسىنداي سوزگە قالعان، ار-نامىسى تاپتالعان ازاماتتار بولسا، جەلىدە بوسقا ءسوز شىعىن قىلماي، زاڭ جۇزىندە ءوز قۇقىقتارىن قورعاسا. ول ءۇشىن اكىمشىلىك، ازاماتتىق، قىلمىستىق زاڭنامادا قانداي جاۋاپكەرشىلىك تۇرلەرى قاراستىرىلعان، ولاردى قالاي قولدانۋعا بولادى، ءبارىن تاپتىشتەپ جازىپ شىقتىم. ءار ادام تانىسىپ، وزىنە كەرەگىن پايدالانۋىنا بولادى.

​بۇدان باسقا، مانسىزدەۋ، قىڭىر-قيسىق سۇراقتاردا، ءارتۇرلى پىكىرلەردە بولدى، ولاردى جازىپ بۇل جەردى ۇرىس الاڭىنا اينالدىرۋ ماقساتىم جوق. سونىمەن بۇل تەما ازىرگە ءتامام!

جەلىدە، قوعام اراسىندا، الەۋمەتتىك، ساياسي ورتادا ءبىر-ءبىرىمىزدىڭ ارىمىزدى تاپتاماي، جەكە باسقا تيىسپەي مادەنيەتتى تۇردە پىكىر تالاستىرىپ ۇيرەنەيىك. ابايشا ايتقاندا، ءسوز تۇزەلمەي، ەل تۇزەلمەيتىنىن ەستە ساقتايىق!

ابزال قۇسپان

Abai.kz