قازىرگى ۋاقىتتا ۇلكەن رەفورمالاردى جۇزەگە اسىرۋعا مۇمكىندىك بەرىپ، كەزەكتەن تىس ءادىل سايلاۋ وتكىزۋ ماڭىزدى. ەڭ الدىمەن، بيلىك وزگەرىسكە دايىن ەكەنىن ءتۇسىنۋىمىز كەرەك. سۋپەرپرەزيدەنتتىك جۇيەنىڭ كەسىرىنەن قازاقستان بايلىعىنىڭ باسىم كوبىنە 162 ادام عانا يەلىك ەتتى. سول ءۇشىن مەملەكەت باسشىسى قاسىم-جومارت توقاەۆ كەلەسى پرەزيدەنت سايلاۋىن وتكىزۋگە ۇسىنىس تاستاعانى - قۇپتارلىق قادام. ونىڭ نەگىزگى ميسسياسى – ادىلەتتى قوعام قۇرۋ. ءدال قازىر مەملەكەت باسشىسى ادىلەتتى قوعام قۇرۋ ءۇشىن وتپەلى كەزەڭنەن ءوتۋ كەرەك ەكەنىن مەڭزەپ وتىر.

كەيبىرەۋلەر ءبىر رەتتىك جەتى جىلعا سايلاۋ ۇلكەن باعدارلامالاردى جۇزەگە اسىرۋعا جەتپەي قالۋى مۇمكىن ەكەنىن ايتادى. بىراق بىزدەگى بۇعان دەيىن قابىلدانعان ۇزاقمەرزىمدى ستراتەگيالىق جوبالار ءساتتى جۇزەگە استى دەپ تاعى ايتا المايمىز عوي. سوندىقتان ناقتى جوسپارعا قۇرىلعان قىسقامەرزىمدى باعدارلاما ازىرلەپ ۇيرەنۋ كەرەك. بۇل بەلگىلى ءبىر ماسەلەنىڭ شەشىمىن تابۋعا سەپتىگىن تيگىزەدى.

ءبىر سوزبەن ايتقاندا، مەملەكەتتىك باعدارلاما جالعاسىن تابا بەرەدى.
قوعام وزگەرىستى قالايدى. بىراق ەشكىم وزىنەن باستاعىسى كەلمەيدى. بيلىك وزىنەن-ءوزى وزگەرە سالمايدى. ول ءۇشىن حالىقتىڭ قولداۋى ماڭىزدى. حالىق تا ساياسي رەفورمالاردى قالاپ وتىر.

مىسالى، وڭتۇستىك كورەيادا پرەزيدەنتتى ءبىر رەتتىك 7 جىلعا سايلاۋ تاجىريبەسى بۇرىننان بار. ولار وسى باسقارۋ مودەلىنە جەتۋ ءۇشىن جىلدار بويى حالىق ەڭبەكتەنگەن. قازىر وڭتۇستىك كورەياداعى دەموكراتيالىق ينستيتۋتتار دامىپ كەلەدى. ال بىزدە بۇل وزگەرىستى پرەزيدەنت قاسىم-جومارت توقاەۆ وزىنەن باستاپ جاتىر. سوندىقتان حالىق پەن مەملەكەتتىڭ يگىلىگى ءۇشىن قولعا الىنعان ءىس قولداۋ تاپسا قۇبا-قۇپ.

ماقسات تولىقباي

Abai.kz