بۇگىن سەمەي قالاسىندا قازاقستان مۇسىلماندارى ءدىني باسقارماسىنىڭ ۇيىمداستىرۋىمەن اباي، شىعىس قازاقستان جانە پاۆلودار وبلىستارى اقساقالدارىنىڭ «قازىنالى قاريا – دانالىق پەن پاراسات يەسى» ايماقتىق فورۋمى ءوتتى.

فورۋمعا قمدب توراعاسى، باس ءمۇفتي ناۋرىزباي قاجى تاعانۇلى، اباي وبلىسىنىڭ اكىمى نۇرلان ۇرانحاەۆ، ءدىني باسقارما جانىنداعى اقساقالدار كەڭەسىنىڭ مۇشەلەرى مەن جەرگىلىكتى يمامدار قاتىستى.

ايتۋلى جيىن قاسيەتتى قۇران اياتتارىن وقۋمەن باستالىپ، كەيىن قمدب-نىڭ جىل باسىنان بەرى اتقارعان نەگىزگى جۇمىستارى بەينەروليك تۇرىندە كورسەتىلدى.

جيىندى اشقان وبلىس اكىمى نۇرلان تەلمانۇلى قاريالارىمىزدىڭ قوعامداعى ورنى مەن تاربيەنىڭ تىرەگى تۋرالى ايتا كەلە فورۋم جۇمىسىنا تابىس تىلەدى. قمدب توراعاسى ءوز سوزىندە ۇلتتىڭ ۇلت بوپ ساقتالۋى، بالا تاربيەسىندەگى بابالار جولى، ۇلاعاتتى ۇرپاققا اقساقالدىڭ كورسەتەر كەرەمەت وبرازى جايلى بايانداماسىندا اتاپ ءوتتى.

«قازاق «كوپ جاساعاننان ەمەس، كوپتى كورگەننەن سۇرا» دەيدى. وندا قارتتىق جاسپەن ولشەنبەيدى، كورگەن-بىلگەن، تۇيگەنمەن ولشەنەدى. ال سىزدەردىڭ وسى جاستاعى كورگەن-تۇيگەندەرىڭىز تالاي جاسقا جىلدار بويى ازىق بولارى ءسوزسىز.

ارداقتى پايعامبارىمىز مۇحاممەد (اللانىڭ وعان سالاۋاتى مەن سالەمى بولسىن) ءبىر حاديسىندە: «ەڭ جاقسى ادام – قوعامعا، ەلگە پايداسى تيگەن ادام», – دەگەن بولاتىن. حاكىم اباي دا «سەن دە ءبىر كىرپىش دۇنيەگە، كەتىگىن تاپ تا، بار قالان» دەيدى. سوندىقتان ءار ازامات «قازاقستان» اتتى الىپ عيماراتقا ءبىر كىرپىش بولىپ قالانىپ، سول ورىندا ءوز مىندەتىن ۇقىپتى، مۇقيات، تياناقتى، ادال اتقارۋى ءلازىم. وسى رەتتە ءبىز قازاق حالقىندا ەجەلدەن قالىپتاسقان اتالار ينستيتۋتىن قايتا جاڭعىرتۋىمىز قاجەت دەپ بىلەمىن. بۇل ينستيتۋت قازىرگى قالىپتاسىپ كەلە جاتقان جاڭا قازاقستاندى كوتەرۋ تۇرعىسىنان پايدالى بولادى دەپ سەنەمىز.

ءومىر مەكتەبىنىڭ سان ءتۇرلى ساتىسىنان وتكەن، كوپتى كورگەن، كورگەنىن كوكەيگە تۇيگەن اقساقالداردىڭ كەڭەسى اۋاداي قاجەت.سەبەبى ءبىز بولمىسىمىزدان ءبىر سوزبەن ەردىڭ قۇنىن كەشىرگەن، قاي زاماندا دا جۇيەلى سوزگە توقتاعان حالىقپىز. سول سەبەپتى سىزدەردى ەل مۇددەسى ءۇشىن بىرىگىپ قىزمەت ەتۋگە شاقىرامىن.

وزدەرىڭىز جاقسى بىلەسىزدەر، مەملەكەتىمىز دامۋدىڭ جاڭا كەزەڭىنە قادام باستى. ەل ازاماتتارىنىڭ باسىم كوپشىلىگىنىڭ قولداۋىمەن اتا زاڭىمىزعا وزگەرىستەر ەنگىزىلدى.ەندى مەملەكەتتىگىمىزدىڭ تۇعىرناماسى تۇبەگەيلى وزگەرمەك.

بۇگىنگى القالى جيىن دا ەلىمىزدى، ەلدىگىمىزدى دامىتۋ جولىندا سەرپىن بەرەدى دەپ بىلەمىن. ءاردايىم بىرلىگىمىز بەكەم بولىپ، جاڭا قازاقستاندى بىرگە وركەندەتۋدى اللا ءناسىپ ەتسىن» دەدى باس ءمۇفتي.

سونىمەن قاتار فورۋمدا ەل اعالارى جابال ەرعاليەۆ، ابدۋللا قاجى جولداس، ماناربەك مۇحامەتجانوۆ، اسان وماروۆ، راشيد بەكتەمىروۆ، زەينوللا توقاەۆ سىندى ەلگە بەلگىلى اقساقالدارىمىز ءسوز سويلەپ، فورۋمنىڭ ءمانىن اشا ءتۇستى.

جيىن سوڭىندا قاتىسۋشىلار ءبىر اۋىزدان اقساقالدار مەكتەبىن جاڭعىرتۋعا كۇش سالاتىنىن جەتكىزدى.

Abai.kz