رەسمي استانا اسكەري موبيليزاتسيادان قاشىپ قازاقستانعا كەلگەن رەسەيلىكتەرگە قاتىستى ماسكەۋمەن كەلىسسوز جۇرگىزەدى. بۇل تۋرالى قازاقستان پرەزيدەنتى قاسىم-جومارت توقاەۆ تۇركىستان وبلىسىنا ساپارى كەزىندە مالىمدەدى.

توقاەۆ ءوز سوزىندە رەسەيلىكتەر قازاقستانعا "امالدىڭ جوعىنان كەلىپ جاتىر" دەدى جانە بۇل جاعدايدى "ساياسي جانە گۋمانيتارلىق ماسەلە" دەپ اتادى. قازاقستان پرەزيدەنتى ەلگە كەلگەن رەسەي ازاماتتارىنا "قامقورلىق كورسەتىپ، قاۋىپسىزدىگىنە ءمان بەرۋ كەرەك" دەدى. بۇعان قوسا، ول "سىرتتان كەلگەن ادامدارعا كومەك كورسەتىلەدى، بىراق جەڭىلدىكتەر بەرىلمەيدى" دەپ مالىمدەدى.

"وسى ماسەلەنى مەن ۇكىمەتكە تاپسىردىم. جالپى وسىنداي كۇردەلى جاعدايدا ءبىز ەڭ الدىمەن ادامگەرشىلىك، سابىرلىق، ۇيىمشىلدىقتى تانىتۋىمىز كەرەك. بىزدە ەشقانداي داعدارىس جوق، دۇربەلەڭ دە جوق. ۇكىمەت ءوز جۇمىسىن اتقارۋى كەرەك. سىرتتان كەلگەن ادامدارعا كومەك كورسەتىلەدى، بىراق جەڭىلدىكتەر بەرىلمەيدى. جۇمىستىڭ ءبارى زاڭ بويىنشا، كەلىسىمدەر بويىنشا جۇرگىزىلەدى. ءبىز رەسەي تاراپىمەن كەلىسسوزدەر جۇرگىزىپ، بۇل تۇيتكىلدى ەلىمىزدىڭ مۇددەسىنە ساي شەشەمىز" دەدى توقاەۆ.

21 قىركۇيەكتە رەسەي پرەزيدەنتى ۆلاديمير پۋتين ەلدە ء"ىشىنارا موبيليزاتسيا" جاريالاعان سوڭ ازاماتتار كورشىلەس ەلدەرگە قاشا باستاعان. قازاقستان مەن رەسەي شەكاراسىنداعى وتكىزۋ پۋنكتەرىندە كەزەك كوبەيگەن ەدى. قازاقستانعا رەسەيلىكتەر كەلگەن تۇستا قالالاردا پاتەر باعاسى كۇرت قىمباتتاپ كەتتى. ەل ىشىندە رەسەيلىكتەردىڭ جاپپاي كەلۋىنە نارازىلىق تا بار.

رەسەي قورعانىس ءمينيسترى سەرگەي شويگۋ موبيليزاتسيا كەزىندە اسكەرگە 300 مىڭ ادام الىناتىنىن مالىمدەگەن. ساراپشىلار كرەملدىڭ موبيليزاتسيا جاريالاۋىن ۋكرايناداعى باسقىنشىلىعىنىڭ ساتسىزدىككە ۇشىراۋىنىڭ بەلگىسى دەپ سانايدى.

Abai.kz