ۇلتتىق قور جانە الەمدەگى بيرجالىق احۋال. پليۋس پەن مينۋستىڭ اراسىنان قالاي ءساتتى جول تابامىز؟

بالالارعا بەرىلەتىن ديۆيدەند تۋرالى جاڭالىق شىققالى بەرى ۇلتتىق قورداعى اكتيۆتەر ماسەلەسى قاراپايىم حالىققا وتە قىزىق بولىپ كەلەدى. جانە وسى باعىتتاعى قازاقشا جازبالار قوردى باسقارۋدىڭ ىشكى كۋحنياسىنان سىزدەردى حاباردار قىلىپ وتىرسا، قارجىلىق ساۋات دەڭگەيىمىز ءبىرشاما ارتپاق.

وسى تامىزدا الەمدەگى بارلىق ۇلتتىق قورلار تەرىس ينۆەستيتسيالىق تابىس الدى. ءبىز ءۇشىن ەتالون بولىپ سانالاتىن نورۆەگيانىڭ سۋۆەرەندى قورى بيىلعى ءبىرىنشى جارتىجىلدىقتا 174 ميلليارد دوللار شىعىنعا ۇشىرادى. ال شۆەيتساريا ۇلتتىق بانكىنىڭ شىعىنى 100 ميلليارد دوللارعا جەتتى. جالپى، نورۆەگيا قورىنىڭ اكتيۆتەرى جىل باسىنان بەرى 5,5 پايىزعا ازايىپ كەتتى. سۋۆەرەندى قوردىڭ قارجىسى شەتەلدىك اكتسيالارعا، وبليگاتسيالارعا، جىلجىمايتىن مۇلىك پەن جاڭارتىلاتىن ەنەرگيا جوبالارىنا ينۆەستيتسيالانعان ەدى.

جوعارى ستاۆكالار داۋىرىندە اكتسيالارعا دەگەن قىزىعۋشىلىقتىڭ تومەندەيتىنى زاڭدى. سوندىقتان جىل باسىنان بەرى اكتسيالاردىڭ قۇلدىراۋى اقش فەدەرالدى رەزەرۆ جۇيەسىنىڭ بازالىق ستاۆكانى ساتىلاي ءوسىرىپ كەلە جاتقانىمەن تىكەلەي بايلانىستى. ءدال وسى كەزدە ينۆەستور ءۇشىن اكتسياعا قاراعاندا تۇراقتى، ءارى قازىرگى جاعدايدا جوعارى تابىستىلىق بەرە الاتىن وبليگاتسيالارعا اۋىسقان الدەقايدا ءتيىمدى.

اكتسيالار قۇلاعاندىقتان، اكتيۆتەرىن سول اكتسيالارعا سالىپ قويعان سۋۆەرەندى قورلار شىعىنعا باتۋدا.

ال ءبىز شە؟ ءبىز قانشا جوعالتتىق؟

ءبىزدىڭ ۇلتتىق قور ۇلكەن تابىستان كورى تۇراقتىلىق، ياعني اقشانى ساقتاپ قالۋدىڭ كونسەرۆاتيۆتى پرينتسيپتەرىمەن جۇمىس ىستەيدى. 2022 جىلى وسى پرينتسيپ ءوز ناتيجەسىن بەردى. ۇلتتىق قوردىڭ اكتيۆتەرى دوللارمەن ەسەپتەگەندە ءبىر ايدا 1%-عا ءوستى، بىراق جىل باسىنان بەرى 2,7%-عا تومەندەۋ بايقالادى. ءبىز باسقا قورلار سياقتى ءجۇز ميللياردتاپ شىعىنعا وتىرعان جوقپىز. سەبەبى، بىزدەگى اكتيۆتەردىڭ باسىم بولىگى قۇبىلىپ تۇراتىن اكتسيالار ەمەس، تۇراقتى تابىستىلىعى بار وبليگاتسيالارعا سالىنعان ەدى.

سوڭعى 5 جىلدىڭ كەزەڭىمەن ەسەپتەسەك، ۇلتتىق قور 4,76% پليۋستە كەلەدى. ەگەر 2022 سوڭىنا تامان اكتسيالاردىڭ قۇلاۋ ءداۋىرى اياقتالسا، وندا ۇلتتىق قور قايتادان جوعارى تابىستىلىق كەزەڭىنە اياق باساتىن بولادى.

ورتاشا جىلدىق ءمانىن الىپ قاراساق، ۇلتتىق قور قۇرىلعالى بەرى ونىڭ جىلدىق تابىستىلىعى 3,05% دەڭگەيىن كورسەتكەن. تۇراقتى ءوسۋ جولىندامىز دەۋگە بولادى. كەزىندە ءبىزدىڭ ۇلتتىق قوردى باسقارۋ ۇلگىسىن نورۆەگيا سياقتى تابىس تاپپايدى دەپ سىناعاندار از بولمادى. بىراق ەندى كونسەرۆاتيۆتى تۇراقتىلىقتىڭ جەمىسىن جەي باستادىق. سوندىقتان تاۋەكەلدى دۇرىس باعامداي بىلگەن ۇلتتىق بانك پەن قارجى مينيسترلىگىنە راحمەت دەۋ كەرەك.

ايبار ولجاەۆ

Abai.kz