قازاقستاندا 1 جەلتوقساندا تويلاناتىن تۇڭعىش پرەزيدەنت كۇنى مەملەكەتتىك مەرەكەلەر تىزىمىنەن الىنىپ تاستالدى.

بۇعان قوسا، 25 قازان رەسپۋبليكا كۇنى قايتارىلىپ، ۇلتتىق مەرەكە ستاتۋسى بەرىلدى. 29 قىركۇيەكتە پرەزيدەنت قاسىم-جومارت توقاەۆ اتالعان وزگەرىستەرگە قول قويدى.

قازاقستاندا تۇڭعىش پرەزيدەنت كۇنى 2011 جىلدان بەرى اتاپ ءوتىلىپ كەلگەن. دەپۋتاتتار بۇل داتانى ەلدىڭ سول كەزدەگى پرەزيدەنتى نۇرسۇلتان نازارباەۆتىڭ "مەملەكەت الدىنداعى ەڭبەگىن تانىتۋ ماقساتىندا" مەملەكەتتىك مەرەكە دەپ جاريالاعان ەدى.

ال 1990 جىلعى 25 قازاندا ەگەمەندىك دەكلاراتسياسى جاريالانعان كۇن ەلدە 2009 جىلعا دەيىن "رەسپۋبليكا كۇنى" رەتىندە اتالىپ كەلگەن ەدى. كەيىن بۇل مەرەكە قوعام قارسىلىعىنا قاراماستان كۇنتىزبەدەن الىنعان.

رەسمي دەرەك بويىنشا 238 ادام قازا تاپقان قاڭتار وقيعاسىنان سوڭ ەكس-پرەزيدەنت نۇرسۇلتان نازارباەۆتىڭ بيلىككە ىقپالى السىرەپ، قازىرگى پرەزيدەنت قاسىم-جومارت توقاەۆتىڭ بيلىگى كۇشەيدى. سودان بەرى ەلدە "نازارباەۆ اتاۋلارىنان ارىلۋ" تەندەنتسياسى بايقالادى. قىركۇيەك ورتاسىندا قازاقستان استاناسى "نۇر-سۇلتان" اتاۋىن وزگەرتىپ، استانا بوپ بۇرىنعىشا اتالا باستادى.

Abai.kz