قازاقستاندىقتار حالىققا قىزمەت كورسەتۋ ورتالىقتارىنىڭ بىرىندە موبيليزاتسيادان قاشقان رەسەيلىكتەرگە ىستىق تاماق پەن شاي تاراتتى. بۇل تۋرالى Atameken business ارناسىنىڭ Facebook پاراقشاسىندا جاريالانعان بەينەماتەريالدان كورۋگە بولادى.

كورىنىستى بەينەكامەراعا تۇسىرگەن كۋاگەردىڭ ايتۋىنشا، حالىققا قىزمەت كورسەتۋ ورتالىعىنا تەگىن داستارحان جايىپ، كورشى ەلدىڭ تۇرعىندارىن جارىلقاپ جۇرگەن جەرگىلىكتى حالىق. ولار كۇندە قولىندا بارىن اپارىپ، وسىلاي قۇجات راسىمدەۋگە كەلگەن رەسەيلىكتەرگە ىستىق ىقىلاسىن بىلدىرەدى ەكەن.

– قولدىڭ تۇشپاراسى، قازاقتىڭ باۋىرساعى، مانتى، تاتتىلەر مەن ىستىق شاي، كوفە اكەلگەن. جىگىتتەر قايدان بولاسىڭدار؟

– رەسەيدەنبىز.

–  بۇرىن قازاقتىڭ باۋىرساعىن جەپ كوردىڭ بە؟

– جوق.

– مىنە، بۇل قازاقتىڭ ۇلتتىق تاعامى. قىسىلماي الىڭىز. نەشە ءتۇرلى اشۋلى سوزدەر جازىلىپ جاتسا دا، قازاق حالقى ارقاشان ءوزىنىڭ قوناقجايلىعىن ۇمىتپاعان. ءومىردى ىستىق-سۋىعىنا قاراماستان قازاقتار قوناقجاي حالىق بولىپ قالا بەرەدى. ورىستار مەن قازاقتارعا جانجالداسۋىدىڭ كەرەگى جوق، -دەيدى كۋاگەر رەسەيلىك ازاماتقا.

بەينەماتەريال استىندا «قىتاي مەن موڭعوليادان كەلگەن قانداستارعا نەگە وسىلاي قۇرمەت كورسەتپەيسىڭدەر، ءوز قازاعىڭدى نەگە جارىلقامايسىڭدار، نامىسسىزدار» دەگەن سارىندى پىكىرلەر كوپ جازىلعان.

بۇگىندە ءپۋتيننىڭ موبيليزاتسياسىنان قاشىپ، ورتا ازيا ەلدەرىنە اعىلعان رەسەيلىكتەر سانى كوپ. قازاقستانعا رەسمي ەمەس مالىمەتتەر بويىنشا 100 مىڭنان ارتىق رەسەي تۇرعىنى كەلگەن. ولار، اسىرەسە، رەسەيمەن شەكارالاس سولتۇستىك، باتىس قازاقستان اۋماعىنا ورنالاسىپ جاتىر. جەرگىلىكتى حالقى 300 مىڭ بولاتىن ورال قالاسىنا 50 مىڭ رەسەيلىك كەلگەن.

بۇعان دەيىن، ورال قالاسىندا موبيليزاتسيادان باس ساۋعالاعاندارعا تۇراتىن جەر، ىشەتىن تاماق تاۋىپ بەرۋ ءۇشىن ەرىكتى توپتار ۇيىمداستىرىلعان بولاتىن. كەيبىر قالتالى ازاماتتار كەلۋشىلەردى ءوز ەسەبىنەن تاماقتاندىرسا، قالادا پاتەر تاپقانشا جاتىن ورىن رەتىندە كينوتەاتر بوساتىپ بەرىلدى. رەسەيلىك احقو انالوگى رەتىندە حقكو-دا قوسىمشا بولىمشەلەر اشىلدى، ول جەردە رەسەيلىكتەر تىركەلىپ، ءتىپتى جۇمىسقا ورنالاسۋعا ءوتىنىش بەرە الادى. رەسەيلىك دارىگەرلەر قوسىمشا ليتسەنزياسىز رەسمي تۇردە جۇمىسقا قابىلداندى.

رەسەيلىكتەردىڭ جاپپاي اعىلۋىنان ەلدەگى جالعا بەرىلەتىن پاتەر اقىلارى كۇرت كوتەرىلگەن. الەۋمەتتىك جەلىلەردە «ءۇي قوجايىندارىنىڭ پاتەردى شەتەلدىكتەرگە جوعارى باعامەن بەرۋ ءۇشىن، تۇرىپ جاتقان قازاقستاندىقتاردى پاتەردەن كوشىرىپ جىبەرگەن وقيعالار» مەن كوشەدە جۇكتەرىمەن ساندالعان ستۋدەنتتەر تۋرالى  اقپاراتتار تارادى.

ايتا كەتەيىك، بۇگىندە 43 پايىز قازاقستاندىقتىڭ ءۇيى جوق، ولار ءارتۇرلى سەبەپتەرمەن پاتەر الۋعا شاماسى كەلمەگەن سوڭ، باسپانانى جالداپ تۇرادى. ۇلتتىق ستاتيستيكا بيۋروسىنىڭ رەسمي دەرەكتەرى بويىنشا، ەلىمىزدە ءبىر جىل ىشىندە قايتالاما تۇرعىن ءۇي باعاسى 26,8% - عا، جاڭا تۇرعىن ءۇيدى ساتۋ باعاسى 19,5% - عا، جالداۋ اقىسى 21% - عا قىمباتتاعان.

Abai.kz