بۇگىن استانادا بۇرىنعى كوممۋنيستىك پاريتيا، قازىرگى قازاقستان حالىق پارتياسى سيەز وتكىزدى. XXI كەزەكتەن تىس سيەزدە پرەزيدەنتتىككە ۇمىتكەر ۇسىنۋ ماسەلەسى قارالدى.

اتالعان پارتيانىڭ باسشىسى ەرمۇحامەت ەرتىسباەۆ وسىعان دەيىن:

«قازاقستان حالىق پارتياسى مەملەكەت باسشىسىنىڭ بۇگىنگى جولداۋىندا جاريالانعان ساياسي وزگەرىستەرگە تولىق قولداۋ بىلدىرەدى. كەزەكتەن تىس پرەزيدەنت سايلاۋىندا، ءبىز بۇرىن مالىمدەگەندەي، قازىرگى مەملەكەت باسشىسى قاسىم-جومارت توقاەۆتىڭ كانديداتۋراسىن قولدايمىز»، - دەپ مالىمدەگەن ەدى.

بۇگىنگى سيەزگە قاتىسقان دەلەگاتتار دا ءبىراۋىزدان پرەزيدەنت توقاەۆتىڭ كانديداتۋراسىن ماقۇلداپتى.

«قازىرگىدەي جالپى الەمدىك اۋمالى-توكپەلى كەزەڭدە قازاقستان ورتالىق ازيادا تۇراقتىلىقتى ساقتاپ قالعان ەل بولدى. ءبىزدىڭ مىندەتىمىز وسى تۇراقتىلىقتى ۇستاپ قالۋ. قازىر ءوزارا تارتىسىپ، ەسەپ ايىرىسىپ وتىراتىن ۋاقىت ەمەس. بىزگە سالقىنقاندىلىق پەن بىرلىك كەرەك. سوندىقتان دا ءبىزدىڭ پارتيامىز جۇرتتان بۇرىن سايلاۋدا پرەزيدەنت توقاەۆتى قولداۋدى ۇسىندى. ءبىز بۇل ۇسىنىستى ەلدى ويلاعاننان ايتتىق»، - دەپ سويلەگەن.

ەرتىسباەۆتىڭ ءسوزىن ورىنباسارى ايقىن قوڭىروۆ تا قولداپ سويلەگەن.

«ءبىزدىڭ ساياسي پارتيامىزدىڭ باعدارلاماسى قازىرگى پرەزيدەنتتىڭ ساياساتىمەن سايكەسەدى. سوندىقتان دا ءبىز الداعى سايلاۋدا پرەزيدەنت قاسىم-جومارت توقاەۆتىڭ كانديداتۋراسىن قولدايمىز. ءبىز الداعى ۋاقىتتا دا جاڭا قازاقستاننىڭ دامۋىنا ءوز ۇلەسىمىزدى قوسا بەرەمىز. توقاەۆ – ءبىزدىڭ پرەزيدەنتىمىز!»، - دەپتى.

سيەز سوڭىندا دەلەگاتتار ءبىراۋىزدان ۇمىتكەرلىككە توقاەۆتى ۇسىنعان.

Abai.kz